呢封利是逗唔逗得過?

新年快樂!每年新正頭開工日,係公司未婚同事向已婚同事吸血嘅大好機會,如果公司夠大又多熟人,老細開工利是又封得爽手,吸到四位數字返嚟都唔出奇!

不過正所謂世上冇免費午餐,問人攞錢絕對係一門學問,喺諗定虛偽嘅祝賀語句、練習定烚熟狗頭嘅表情之前,你首先要知道──可以向邊啲人逗利是。

呢封利是逗唔逗得過

已結緍同Team上司/同級同事(俾利是甘心度 = 100%)

大家坐埋同一條船,返工見面仲多過見自己屋企人,新年點都要做返個好意頭,第時大家合作都開心啲。呢舊錢,預咗要畀㗎啦!


未結緍直屬/同Line上司(俾利是甘心度 = 80%)

「人哋都未結婚,點解要問我攞錢喎,嗚嗚。」不過正所謂出得嚟行,預咗要還,啲o靚咁辛苦同你搏殺咗一年,俾返封開工利是獎勵吓都應該嘅。


已結婚非同Team同事──熟(俾利是甘心度 = Friend度)

得閒會約吓食飯,撞口撞面會吹兩句嘅同事,一般都唔會介意封返封利是,甘心度會同Friend度成正比。不過預咗收錢時會有啲說話聽:「逗埋今年好啦喎!」「幾時到你派(返畀我個仔)呀?」……


已結婚非同Team同事──唔熟(俾利是甘心度 = 10%)

仲有咩好講?平時黑口黑面,pantry撞到都扮睇唔到,到新年先走嚟搲利是?咩話,仲要背後唱我封得10蚊?下次封朱古力金幣畀你吖喇!


未結緍非直屬/同Line上司(俾利是甘心度 = N/A)

望咩望?彈開啦!


茶水姐姐(俾利是甘心度 = N/A)

唔好以為熟就可以問佢攞錢,皆因茶水姐姐識哂全公司,上至高層下至嘍囉,唔通要派哂俾所有人?除非佢主動派俾你啦。

 

註:以上分享純屬參考性質,請不用太認真,祝各位逗利是順利!

 

延伸閱讀:

[生財有道]Top 5公司逗利是惡劣行徑

辦公室逗利是攻略

辦公室逃避派利是攻略

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案