喺共享辦公室返工 有辣有唔辣睇真啲

新公司係共享辦公室?有辣有唔辣睇真啲

近年愈來愈多公司租用共享辦公室(Shared workspaces / co-working spaces),呢種新興辦公室同傳統辦公室有好大分別,例如裝修傾向採用開放式設計,感覺比較舒適輕鬆。另外又有唔同形式嘅座位選擇,日日換位都無問題。共享辦公室有齊所有影印機、辦公桌、WiFi等基本設備,租約又相對彈性,只租幾個月都無問題,成為唔少初創公司熱捧嘅選擇。

如果你正在考慮租用,或者見緊嗰份新工係喺共享辦公室返工,不如睇吓有咩優點同缺點啦!


優點一:隔離位係同行,互相取經

共享辦公室其中一個最大嘅特色就係開放式設計,可以成為同行互相交流嘅平台。好多小型初創公司例如網購店主、應用程式設計公司等等都可以互相交流經營心得,即使遇上同行都未必「如敵國」,反而可以分享大家遇到咩困難,點樣解決等。

部分共享辦公室都會定期舉辦針對唔同行業嘅講座、品酒會、Fashion show等等,所謂識人好過識字,呢啲活動都係識人同累積人脈嘅好機會!


優點二:食物娛樂好齊全,氣氛輕鬆

共享辦公室基本上都齊有小食同飲品供應,做做吓嘢見餓,又未行得開去食飯,都唔怕會餓親!有部分二十四小時營運嘅共享辦公室更加提供淋浴間,工作到夜晚,或者係附近跑完步、做完Gym都可以沖個涼Refresh一下。

有部分共享辦公室甚至提供VR、PS4等娛樂設施,工作中途想放鬆一下都無問題,對講求創意同交流嘅行業好似廣告、設計等等,度橋一流呀!


不過,凡事都係一睇兩面,有辣有唔辣嘅。打工仔注意啦,如果你見工時發現公司係租用共享辦公室,某程度上代表公司未進入穩定期,有可能發展得好好,亦有可能會走下坡,自己睇定啲啦!另外,開放式設計嘅工作環境亦未必適合所有人。


缺點一:無固定坐位,可能影響記性

有心理學家提出,大腦會將當下嘅記憶同四周嘅環境細節連結起來,所以坐喺固定嘅位置、身邊有固定嘅擺設,係有助記住更多信息。相反,如果返緊共享辦公室而又日日坐唔同嘅位置,可能會令人冇咁易記住工作嘅內容㗎。


缺點二:開放式設計,專注力易下降

有好多老闆都想員工之間多啲交流,可以Brainstorm到好嘅Idea。不過理想同現實始終係有差距嘅,喺開放式設計嘅辦公室,只要任何一個同事有動靜,例如傾計、打電話、起身斟水、開零食、走動,種種噪音其實都會影響所有同事,無法專心工作。

另外,傳統辦公室一般都有圍板間隔,員工有一定程度上嘅私隱,老闆唔喺附近時可以偷雞做吓自己私人嘢。但係共享辦公室嘅開放式設計,令所有人嘅動靜都一覽無遺,同事們為咗「扮工」顯示自己做緊嘢,呢種心理壓力隨時反而令員工嘅工作效率同質素下降。


共享辦公室睇落裝修闊落又型格,部份甚至有維港海景、酒店Gym room、任飲啤酒,的確好吸引。不過,有優點亦有缺點,打算租用或者搵緊工嘅各位都要諗真啲呀!

 

延伸閱讀:

偵探手記:私家偵探全套出job工具揭秘

踏入30歲開始體會到的7個苦處

失去事業卻找到愛 在黑暗中傳遞生命光輝

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案