地盤佬日誌—價錢、工期、質素成正比?

地盤佬日誌- 價錢工期質素

又要馬兒肥又要馬兒不吃草,平靚正呢個諗法係每個老闆都想㗎,但當然係事與願違啦。

質素

喺建築上面嘅質素講嘅係主要來自兩樣嘢—材料嘅質素同埋師傅嘅手藝。

材料基本上大部份情況都係錢嘅問題,只要愈貴嘅材料多數品質愈優良,不過都有啲情況唔係咁嘅例如有時上價嘅中國材料同低價嘅歐洲材料比較,可能價錢係差唔多,但係中國嘅上價材料可能質素更加好。另外例如雲石呢啲有啲藝術性嘅材料,可能因為佢個花紋愈靚就愈貴,但係其實花紋實質嚟講係裂紋,所以有陣時貴嘅可能仲易爛。不過呢啲情況都係少數。

師傅嘅手工,同樣一個工序如果有一個好嘅師傅做同一個「嗱西」嘅師傅做出嚟嘅成果可以係差天共地,不過除非真係做得好垃圾啦,如果唔係其實做完收貨嗰一刻普通人未必睇得出,但係路遙知馬力,有啲嘢過多幾年就可能知㗎啦,例如有啲師傅做啲水喉幾十年都唔爆,但係有啲師傅做出嚟嘅幾年就左邊爆完爆右邊。

▪ 地盤佬日誌—地盤衛生條件

▪ 地盤佬日誌—地盤安全裝備

工期

所有地盤嘅計劃工期都係完美嘅,但係可惜人類同埋世界都唔係完美嘅,所以基本上從來都冇人可以完全按到開工前訂落嘅工期去完成一單大型嘅工程。仲有就係啲老細最鍾意就係迫大家快啲起貨(但係又唔加錢),呢個情況多數啲判頭都會叫啲師傅去加班追工期,但係以我所見多數加班做出嚟嘅嘢質素都係麻麻,原因都好簡單嘅,當一個人做完八個鐘之後體力開始下降,之後做出嚟嘅嘢點會係100%體力嗰陣時咁好呀。我自己做過工程做得最快嘅方法就係比獎金,只需要老細訂一個合理嘅工程加預期完成會有一個有吸引力嘅獎金,啲判頭就點死都會死到俾你。

價錢

雖然錢唔係萬能但係冇錢就萬萬不能,除非真係不可能嘅任務,例如你要一日起晒成幢樓嗰啲之外,多數嘢係合理情況下俾錢係可以解決嘅,例如你想起快啲就比獎金,你想質素好啲就比多啲錢去買啲靚料,搵啲出名好質素嘅判頭都可以解決到嘅。

每樣嘢都有取捨,做之前都要諗一諗邊樣優先考慮。

 

港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章
 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

The most-talked about topics 

Scroll to Top