我覺得地盤佬係其中一種最唔好惹嘅人。雖然近年地盤佬嘅文化水平已經高咗好多，但係始終都係從事粗重工作，粗聲粗氣就在所難免。加上，地盤做嘢比較容易上火，所以同人嗌霎係比較多，但係我都建議非地盤佬盡可能唔好同地盤佬嗌交。
地盤打交文化
我自己喺地盤都見過唔少次打交情況，單挑、圍毆、群毆都見過。通常都係初則口角，繼而動武，詳細啲就因為通常可能係爭位，或者某個人整爛咗其他人啲嘢，之後就會開始嗌交。通常呢個情況都仲係比較安全㗎，但係啲老師傅同我講有兩個暗號通常出現咗就會真係打交：第一個暗號就係有人大嗌粗口問候人母親；另一個暗號就係打交雙方都會將手上啲架撐大大力掉晒落地。通常呢兩樣都出現咗就一定打，其他閑雜人等退後少少避免比流彈誤中。當年我都好奇咁問點解要掉晒啲架撐，唔係有架撐先至好抽啲咩？老師傅就答我：地盤裏面打交不成文嘅行規，大家焗住導氣咪打場拳頭交囉，打完贏咗輸咗都唔會太傷，多數情況休息一兩日又可以再開工。但係擸架撐嘅受傷水平就係幾何級數咁上，輕則重傷，重則贏就打死人，之後自己俾人捉去坐監，輸就可能俾人打死。不過地盤偶然都會有人唔理行規或火遮眼就會釀成大事。
地盤佬點對外面啲人？
係我自己眼見來講，多數地盤佬一對住外人就會自動轉左斯文mode，音量會盡量降低，粗口亦都會盡量減少。不過佢哋嘅斯文mode都未去到一般人嘅水準，但係多數已經盡咗力。
不過如果你咁唔好彩激嬲咗個地盤佬要同佢隻揪的話，我相信多數地盤佬隻揪嘅實力，喺香港來講都可以排到頭20%。就算你係一個散打王，你要撩一個地盤佬打交，都要睇清楚佢附近有冇兄弟，如果唔係就會變咗圍揼。
另外有樣嘢，就係我眼見到嘅係如果係街有啲唔公平嘅事發生，例如打尖，多數啲斯文人都會唔出聲，出聲鬧嗰個通常都係粗聲粗氣嘅地盤佬。加上地盤佬嘅形象鮮明，所以好多人都會覺得地盤佬同人爭執係比較多。
所以我嘅結論都係如無必要盡量，唔好惹啲地盤佬！
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
