地盤佬日誌:地盤佬的快樂新年

地盤佬日誌:地盤佬的快樂新年

地盤佬全年最開心嘅節日就係農曆新年,又有得真係放下假,呢段時間壓力又細啲,俾人鬧嘅機會都少啲。


難得的放假

現在位處市區或近民居的地盤都會放星期日同紅日,或停咗多數會俾人投訴嘈嘅工作;但係啲山旮旯啲嘅地盤就會唔理紅日,日日全速開工。所以而家都仲有啲師傅係全年無休,淨係會喺新年放幾日假(我真係佩服佢哋)。

其實以前傳統嚟講,地盤新年假通常係放到初七或者初十。不過近年工期越嚟越緊迫嘅情況下,好多地盤都開始只放紅日,我自己仲試過年初一二都開工。不過你留得住個人,唔等於留得住我個心,就算真係返工,初四五六嗰幾日多數師傅都好心散,工作效率都冇平時一半。


其他特別新年福利

我自己其實就主要做顧問同大判,所以只係可以同大家講吓上家嘅福利。簡單嚟講,越多判頭、越多行頭開工就越好,首先新年前有唔少分判嘅春茗都會邀請埋上家去食,仲要唔少都有抽奬,我之前就試過有一年食咗十幾餐春茗。利是方面,開工啲判頭一人一封都可能收到幾十封,每封最少都$100;不過當然都試過地盤冇咩判頭,得返公司嗰封$20開工利是,自己仲要揞錢派返畀啲o靚仔同雜工。


有冇人唔鍾意新年呢?

新年有假放又有利是收就梗係開心,不過如果你明知個地盤新年之後無耐就要起貨,或進度嚴重落後(其實喺老細眼中每個地盤都係進度嚴重落後),咁就真係對新年又愛又恨喇,因為一放完假返去就要俾老細不停咁捽死。


新一年心情好

其實平時地盤每日都好多拗撬,做錯少少嘢、做得慢少少都會俾人用粗口鬧。不過通常新年前後,就算你做得幾慢都好少人會鬧你。畢竟大家都唔想走去開人年或俾人開年,大家都突然將心比己,一齊開心過年(不過當然都有啲魔鬼老細係例外啦)。

最後,我都祝大家開工大吉,事事順利,工作安全零意外。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:澳漂工程佬

地盤佬日誌:有汗出,要有糧出

地盤佬日誌:新。地盤佬

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案