地盤佬日誌:地盤佬的最佳拍檔──搵食架生

construction_equipment_2

正所謂工欲善其事,必先利其器。差唔多任何一個依賴手藝嚟搵食嘅行業,都需要一套相應嘅架生(工具)畀師傅工作,例如廚師手上嘅鑊鏟同刀,運輸工人手上嘅手推車。同樣地,地盤佬手上亦有各式各樣嘅架生,而每個行頭更有不同嘅架生,無咗啲架生基本上連工都開唔到,而如果架生唔就手,就算大師傅嘅功力都會減半。


有趣的地盤架生

我覺得地盤最有趣嘅架生,莫過於「土炮平水尺」──因為地盤或裝修場地嘅地面不平,所以開始任何工作之前,首先要用平水尺在全房開出一條1米高嘅平水線,之後所有房內嘅高度都按呢個基準計算(例如假天花底在線上1.2米,燈掣在線上0.3米,木地板面在線下0.95米,如果平水線有錯就之後所有工序都會錯)。

喺高科技工具(如激光平水儀)未普及嘅年代,裝修佬開大面積平水線時係唔會用一般嘅平水尺,因為一般平水尺會有誤差。而當時佢哋就會用一條長長嘅透明軟管,裝八九成水之後當平水尺用,開出來嘅平水點係好準確的。其實呢個民間智慧係利用咗物理學上U型連通管嘅原理,因為大氣壓力一樣,兩邊管口嘅水永遠係喺同一高程、水平位置的,真係高手在民間。


另外有啲架生,一放咗上身就好有趣,一睇就知佢做邊個行頭:

「地盤武士」──釘板佬。點解?因為個個釘板佬腰間都有一支長長嘅鎚仔,睇落就好似一支武士刀咁。

「有尾的地盤佬」──搭棚佬。佢哋通常後面都有一紮紮竹用嘅膠帶,睇落就好似生咗條尾咁。


邊種地盤佬嘅架生最精簡?

紮鐵佬──大眾眼中嘅鐵漢子,個個都鋼條身型、手瓜起腱,但係佢哋嘅基本工具就只係一支細細隻、用嚟紮鐵線嘅鈎仔,同佢哋嘅身型好大對比,真係一隻鈎仔養活全家(其實即係用紮鐵佬嘅體力同辛苦嚟搵錢)。


架生是你的最佳拍檔

返工想順利,當然要同其他兄弟(同事)好好合作,但係喺地盤工作,其實好多時都係要單打獨鬥,呢個時候手上的生財工具就係你嘅最佳拍檔。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:地盤貂蟬

地盤佬日誌:地盤多粗口 講呢句隨時畀人打

地盤佬日誌:地盤(勞民傷財)的安全措施

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Building & Construction職位