地盤佬日誌:地盤多粗口 講呢句隨時畀人打

地盤佬日誌:地盤佬多粗口 講呢句隨時畀人打

一般地盤佬畀人嘅感覺都係又煙又酒又粗口。雖然事實上地盤佬的確係比較粗魯,但係有部份粗魯嘅行為,係喺地盤生存嘅必要技能──例如講粗口。


點解一定要講粗口?

喺地盤做過嘢嘅人對粗口都一定唔陌生,其實粗口係有幾個實際作用:

一:當你需要用好大力氣做嘢或好勞累嘅時候,講幾句粗口真係可以提高士氣。

二:面對老闆或者上家嘅無理要求時,用嚟發洩,如果唔係谷埋谷埋,個人好易黐線。

三:用嚟做戲。地盤鬧人都有分真係鬧你同做戲,因為地盤每天都有九百幾個工序同時進行,實有啲地方係手工唔好或者趕唔到進度。發生咗問題就要搵人負責任,而最簡單就係搵個人嚟鬧,最緊要畀啲上司或者上家睇到,仲要鬧得越凶狠越好。做戲鬧你嗰啲有時事後都會同你講聲唔好意思;不過如果係真鬧嗰啲,有時都會鬧到人身攻擊同動真火。


地盤粗口都有禁忌

我大聲、講粗囗,唔代表我無禮貌。因為地盤都係比較嘈,唔大聲啲其他人根本聽唔到你講咩。

雖然地盤每日都粗口橫飛,但係其中一句日常社會好常用嘅粗口,反而地盤好少聽到人講,因為呢度有個禁忌──講咩都得就係話人媽媽唔得(反而你用某種中式食品嘅諧音代替就冇乜問題)。地盤鬧交係對事唔對人,而且通常鬧完就算,但一有人講人媽媽,大家都會好快動真火,甚至馬上就打交,而話人媽媽嗰個畀人打都無人可憐。所以我奉勸大家無咩事,真係唔好話其他人嘅家人。


唔講粗口得唔得?

各位師傅們,雖然粗口係地盤文化,但係如果唔想其他人睇唔起地盤佬,大家不妨斯文少少,唔好句句都加幾隻粗口助語詞。返工其實賣嘅應該係專業,唔係賣尊嚴。就算你幾叻都好,都應該對所有人有基本嘅尊重。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:地盤(勞民傷財)的安全措施

地盤佬日誌:地盤佬的快樂新年

地盤佬日誌:澳漂工程佬

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案