地盤佬日誌:地盤移動

喺地盤裏面人員同物資嘅移動有分垂直移動同水平移動。順唔順暢影響重大。

地盤佬日誌-地盤移動

物資移動

一個地盤做得順唔順暢,好重要嘅一環就係運輸。水平運輸主要係車路同存放點,入地盤車路多數係可以行大貨車去到存放點,存放點之後就只需要行到細車如鏟車、貓仔甚至係手推車就OK,最緊要係運送到垂直運輸點。

垂直運輸喺起結構期間多數係用天秤吊上樓面,泥水期間多數都係用開士機/工人籠,裝修期間就多數都用番電梯。之前有單項目因為個老細想慳錢放少咗部開士機,搞到上面啲師傅日日都唔夠材料做嘢。

▪ 售前工程師 要識sell又要識IT 年薪高達百二萬 唔使考牌但入行超難

人員移動

水平移動其實最簡單來講就係人行嘅路,不過地盤裏面嘅路比較奇怪,可能日日都唔同,有時今日行到,聽日就已經堆晒貨或者搭晒架,要搵過另外一條路。

垂直運輸就有工人籠、電梯同真係用得最多嘅樓梯。好多行外人會以為地盤有工人電梯工人就唔使行樓梯,其實唔係㗎,通常工人籠都係十幾廿樓先至起(有時直頭唔起),加上多數都係五至七層先有一個出入口,所以其實都係要行好多層。就算之後有咗真正電梯都唔代表唔使行樓梯,因為呢個時候嘅電梯通常係運貨加上係由電梯女郎(阿姐)操控,所以通常上樓都冇問題,但係落樓如果冇對講機就真係要行落去。之前有個地盤有段時間我日日都行百幾層樓梯。

▪ 考香港牌好 還是英國牌好?資深工程師兼考牌教練為你拆解!

▪ 基建頻出爐 測量師好「搶手」!經驗註冊測量師月薪高達八萬 成為測量師三部曲!

特殊移動

後期拆棚後嘅外牆工程通常都係坐臨時吊船。

之前地盤有次有個工人係30樓樓面受重傷,嗰個地盤又冇工人籠,因為情況緊急,最後唯有用天秤吊佢落去(如非緊急特殊情況請勿仿效),有啲超大型嘅地盤甚至會有內運工人的車。

一個地盤管理得好唔好,我自己好睇重兩樣嘢:1.廁所乾唔乾淨; 2. 安全通道合唔合理。

港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章
 

延伸閱讀:

地盤佬日誌:政府工程貴在程序同文件

地盤佬日誌:工程師的慢慢長路

地盤佬日誌:地盤管理

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Building & Construction職位