地盤佬日誌:地盤貂蟬

地盤佬日誌:地盤貂蟬

前言:以下文章係由本人一位已婚嘅美女工程師提供,由女性嘅角度去睇地盤嘅女性

正所謂「地盤三幾年,豬扒都變貂蟬」。現代社會做工程嘅女仔已經比以前多,例如工程師等文職或者掃地阿姐(雖然男女比例都係幾十比一),所以地盤嘅貂蟬種類都自然多咗。雖然各「嬋」入各眼,但只要佢哋一出現,都會使男士們嘅心情大為開朗!


女仔都分好多類型,我就將佢哋分為以下三類:

第一類:唔使出地盤嘅貂蟬,當中再細分為「努力做事型」同「打扮到隻嬋型」。後者是非多,化個濃妝同著條返中環工咁嘅裙,自覺很美,得閒同啲仔仔放吓電,或者溫柔聲收兵仔,男人通常受落當娛樂。

第二類:要出地盤嘅貂蟬,當中再細分為「斯文型」同「粗獷型」。兩者本身都係打扮樸素,性格開朗,多數做事認真,但前者會比較怕地盤污糟,受男同事歡迎程度多過後者。

第三類:最後一種就係「真。阿嬋」。地盤多數清潔工作都係阿姐做,所以其實阿姐級的地盤貂蟬係最多,部份阿姐去到一定嘅年齡,又有另一種韻味。佢哋多數好照顧大家,對同事們好似阿媽咁溫馨,係地盤不可缺少。


做地盤貂蟬嘅好處同壞處

聽說近年好流行地盤Look嘅美女,只要放上網就可馬上爆紅;就算唔係艷壓群芳嘅級數,只要有少少靚,都可以喺地盤收到一地兵兵,萬人殷勤。不過好現實地,唔靚態度又串嘅女仔待遇可能比男人更差。

不過,地盤好多方面係啲女仔好難接受。除咗大地盤之外,多數地盤嘅廁所都係臭氣沖天,男人都唔係個個接受到,女仔又唔可以就地解決,所以都係一大難題。而且夏天出地盤,一定會曬到變黑人,個Bra又會濕到揸得出水,全日都唔乾。另外,喺地盤基本上每日都會見到唔少動物,例如大老鼠,地盤妹入地盤做之前要有心理準備。


喺地盤搵真愛?

作為地盤貂蟬,唔多唔少會有啲男同事對你表示好意,又唔使話咩都拒絕人嘅,人哋對你好,你咪對返人好囉,總之知道大家嘅底線,唔好玩曖昧玩出火。其實係唔係做地盤都係咁㗎啦。祝大家都搵到最適合自己嘅另一半!

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:地盤多粗口 講呢句隨時畀人打

地盤佬日誌:地盤(勞民傷財)的安全措施

地盤佬日誌:地盤佬的快樂新年

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Building & Construction職位