地盤佬日誌:夏天,為地盤佬帶來汗水

地盤佬日誌:夏天,為地盤佬帶來汗水

夏天為大地帶來美腿,不過為地盤就只會帶來惡夢。對地盤佬嚟講,一年四季裏面,最辛苦一定係又濕又熱的夏天。


點解夏天咁辛苦

香港夏天嘅熱係濕熱,而地盤嘅環境就比外面更加濕熱。每個夏天我都會見到十個八個師傅中暑,理由有好多,例如著咗安全三寶(安全帽安全鞋反光衣)特別侷促、地盤通風唔好、混凝土同英泥使用後會出現水化熱化學作用等等。

另外,夏天地盤特別多蚊同老鼠,而根據非正式統計啲蚊係特別鍾意親吻工程師(即係我);有時啲飯盒幾日無人清理又會臭到死。正常人真係唔會想留喺呢個咁嘅地方超過五分鐘。

如果天口真係太熱,好多師傅都會自己雪一支2公升嘅冰,加條毛巾包住返嚟,咁就半日都有冰水飲,又可以有條冰毛巾用下。至於蚊患方面,有啲師傅頂唔順就會燒報紙驅蚊;雖然呢樣嘢有明文禁止,理論上應該只可以用蚊香同蚊怕水,但係地盤啲蚊太惡,蚊香蚊怕水其實冇乜用。


辛苦得來唔一定有回報

返工辛苦就一定㗎啦,辛苦得來最重要都係想有回報啫。之不過,夏天辛苦得來反而係人工最少嘅一季,點解?因為多數地盤佬都係日薪工人,打風落雨無工開嗰日就無人工。

正常情況下,如果嗰日開唔到工,個分判管工會打電話通知啲師傅唔使返工。不過有時啱啱返到去先落大雨,返到地盤門口先知唔畀入,呢種情況老行規係要畀返半日人工,後來變成畀$100車錢,有啲老闆直頭一蚊都唔畀添。咁嘅情況再加埋天口咁熱,所以有啲富貴又技術好嘅老師傅就會放暑假啦。(又因為咁所以啲後生嘅師傅夏天特別容易搵工,不過一到秋天又會失業。)


管理層可以點樣關顧吓啲師傅?

首先,地盤最重要嘅係一定要提供足夠嘅飲用水,可以的話就放多啲寶路華(地盤嘅風機)改善通風。有啲比較好嘅承建商,夏天會定期提供寶礦力丶涼茶等等,畀啲師傅下下火(我自己覺得作用不大,不過心意嘅嘢有好過無)。有啲外國嘅地盤,夏天會喺最熱嘅11點至下午2點休息,不過香港就因為環保法例(晚上不能開工)加上工期趕急,所以好難實行。


好多人都鍾意夏天,但係我諗都無乜地盤佬會特別鍾意夏天啦。年青人,係咩驅使你炎炎夏日都仲嚟開工做地盤工啊,係愛定係責任啊?答:係窮啊。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:地盤佬的最佳拍檔──搵食架生

地盤佬日誌:地盤貂蟬

地盤佬日誌:地盤多粗口 講呢句隨時畀人打

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Building & Construction職位