近年做工程嗰啲文件真係一日比一日多。聽講幾十年前嘅地盤，係由頭到尾都唔多文件，但而家閒閒哋一支樓仔都可以出幾千份文件。基本上，將啲文件攤開佢嘅話，面積好可能會大過總樓面面積。
主要建築文件的分類
首先，所有建築都先要有探土丶周邊環境／限制的文件、比設計師們做佢哋嘅設計圖、做各種計算（GFA力學風量排水量等等），以及其他對政府同埋發展商嘅文件。之後就到工料測量師們計返嗰樣嘢嘅工程量用嚟做合約。然後到承建商同埋分判入場，開始要入返啲進度計劃、施工方案、材料報批、風險評估、施工深化圖等等一系列嘅文件。再之後就係一系列嘅業主、設計、承建、分判相互間嘅信來信住，包括你話我慢、我又話你阻住我、我又話你增加咗嘢要加錢、你又話我整爛你啲嘢要扣錢等等，同埋仲有好多測試文件、做完嘅驗收文件。
文件的用處
呢個世界上，每樣嘢存在都有佢嘅意義。雖然好多地盤人覺得好多文件都好廢，但係佢哋（文件）都有佢嘅用處。由初期嘅建築大綱，到慢慢細化每樣嘢，先令到呢個建築物從大方向去到每一個細位都能夠合理地興建出嚟。
冇實際作用的文件
其實喺地盤裏面有一種文件，佢唯一嘅作用就係將所有嘅責任推卸比其他人。通常呢種文件都係會寫「乜嘢都唔關我事，有咩事衰咗就係其他人嘅問題」。呢種文件喺地盤裏面經常都有。
地盤文件人
因為近年地盤嘅文件越來越多，衍生出嚟嘅就係喺地盤做文件嘅人亦都越來越多。十幾年前我入行嗰陣時，覺得好似每個地方都係管工多過工程師，到咗而家我覺得多數都開始調返番轉。係工程師多過管工。
其實我都唔應該呻呢啲嘢，因為就係因為多咗咁多文件要做，我哋啲工程師先有得做㗎嘛！
港夫．李澳
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
