地盤佬日誌:澳漂工程佬

地盤佬日誌:澳漂工程佬

其實一直以嚟,都有唔少香港嘅工程人員會衝出香港,走去其他地方發展,其中主要係中國內地、中東同澳門,亦有聽過越南、新加坡、塞班等等。今次就介紹吓我比較熟嘅澳門。


點解澳門會需要香港工程管理人員?

其實澳門一向都有唔少工程人員,但係佢哋做開嘅工程項目都係比較小型,而香港就有好多做開中大型項目嘅工程人員。情況就好似做開細公司嘅就會樣樣都識,做開大公司嘅人就會好專長做某一小部份,大家反轉嚟做都係做唔嚟。而近年因為澳門有幾個超巨型嘅賭場項目興建,所以就有不少香港嘅工程管理人員過咗澳門搵食。


邊啲工程人員會去?

以我所知,之前沙士年代香港冇嘢做,好多地盤佬都過咗澳門起威尼斯人等等。不過近年因為內地工人水平開始比較好,又平過香港工人好多,所以變咗主要係工程管理人員同比較特別專業嘅工人,先會走去澳門搵食。


去澳門做有咩好?

首先工作量方面,因為多數香港人去做都係做巨型賭場項目,呢啲項目嘅特色就係「無限金錢」,最緊要快起好,所以喺工程人員嘅編制上會特別寬鬆,平均每個人嘅工作量都比較少(同喺香港做相比)。

大家打工都係為錢㗎嘛,而由香港請去澳門嘅人,正常都會有一份生活津貼,而份津貼正常係足夠你租屋、交電話費、買船飛等等,之後仲有少少錢剩;如果想慳啲去珠海住,或者同人分租,仲可以再剩多啲錢添。

生活上,「住」同「行」我都覺得澳門好過香港。住方面,澳門嘅租金比香港平,屋又大啲;行方面,雖然澳門係「巴士上唔到,的士唔車你」,但因為澳門細,所以交通時間一般都比香港短。


去澳門做有咩唔好?

首先雖然澳門好近,但係離鄉別井做嘢,同家人嘅關係始終都會差少少,除非好似我某啲同事咁,每日都即日來回澳門香港(體力神人)。另外,香港人喺澳門做嘢係當外勞,所以工作保障上係冇本地人咁好:試過有朋友喺藍卡(外勞証)到期嗰日被人炒咗,一蚊都冇得賠;亦試過有朋友辭職或俾人炒咗之後,被僱主鎖埋藍卡,幾年內唔可以喺澳門做嘢。


去唔去馬?

事實上,澳門嘅生活比香港悶(喜歡黃賭除外,當然我唔係鼓勵你去咁做),但我啲香港朋友嚟咗澳門之後,多數都想一直留低。只有一種人唔建議佢去澳門做,就係無咩自制能力嘅賭鬼。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:有汗出,要有糧出

地盤佬日誌:新。地盤佬

地盤佬日誌:風雨飄搖中的地盤佬

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案