地盤佬俾人嘅印象就係污糟、粗魯同高人工。不過又唔係個個地盤佬都一樣咁高人工。有啲啱啱入行嘅人，會發覺人工其實唔係想像中咁高而大失所望。不過當然有啲人係年薪百萬。
師傅嘅人工
通常啱啱入行嘅白紙，人工都係唔過千日薪，做返三兩年之後升到中工先至會係人工千幾日薪，多數麗水同埋機電嘅行頭升到上大工都係千尾，係結構三寶（釘板扎鐵落石屎）機手同某啲特殊專業先至會係兩千幾日薪。不過都有某啲特殊工種係可以年薪百萬嘅，例如天秤手，爆破專家等等。
公眾睇到嘅地盤佬人工多數都係工會公布價，不過其實多數大工都係攞唔到嗰個價錢，例如有啲蛇頭費之類嘅錢要比返出嚟。
另外我依家做緊嘢嘅地方澳門，因為有外勞關係，所以地盤佬嘅人工係好抵，澳門人平均日薪係唔過千（外勞平均價係六七百左右）。
管理層嘅人工
入地盤做管理層通常都係先苦後甜，啱啱入行通常都係萬零兩萬蚊，同一個普通文職其實唔係差好遠。但係係做咗幾年之後考到專業資格或者升咗一兩級之後，人工就開始會漸入佳境。如果叻仔又好運嘅升咗上PM就年薪百萬不是夢，如果幫公司搵到錢分分鐘淨係花紅都可以過百萬。
除咗人工仲有福利
如果師傅來講就有分兩隻㗎一隻係公司工，另一隻係日薪工。公司工通常都有按照勞工法例裏面最低限度嘅福利，日薪工就基本上零福利，不過人工會比較高。管理層嘅福利就同其他文職行業冇乜大分別。
年資越高人工越高？
一般情況下都係年資越高人工越高，不過例如師傅嘅話升到上大工就會停止增長。不過都有啲人做極都係升唔想去，例如見過某啲做咗十幾廿年都仲係做緊掃地嘅雜工，亦都見過啲工程師做到五十幾歲都都仲係做緊啲AE都取代到嘅工作。其實總之做任何一行都好，都要不停地提升自己嘅技能，如果唔係終有一日會被淘汰。
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
