地盤佬日誌:鬧市中的摩西

地盤佬日誌:鬧市中的摩西

如果你想做一隻漆黑中嘅螢火蟲,你可以試吓喺返工、放工或者食飯時間,着住一身地盤look,在某某高級商業區最迫人嘅街道行過──你就會發現你好像開了「絕對領域」一樣,又或者好似摩西咁,明明其他人人與人之間嘅距離只有幾cm,但你和其他人的距離最少有半米,有如摩西過紅海一樣將人流分開,這一刻你就會發現原來你係咁鮮明出眾。


污糟邋遢?

好多人都覺得地盤佬係好污糟㗎,的而且確,好多地盤佬返工嘅時候都係好污糟,因為成個地盤本身就多泥沙、污糟水、英泥、膠水,樣樣都污糟。再加上因為在有如桑拿浴室的環境下作粗重嘅體力勞動,令到一個正常嘅地盤佬喺開工嘅時候,條底褲多數都濕到可以揸得出汗水。嗰種污糟同埋臭,其實好多地盤佬自己都頂唔順,所以而家大部份地盤佬放工嗰陣時都會換衫;如果有淋浴設備嘅,多數師傅都真係會沖個涼先放工,或者最少都會攞條濕毛巾抹身,有啲甚至會噴啲古龍水先走。


摩西的感覺

作為一個地盤佬,最難接受嘅未必係工作上嘅辛勞或者體力上嘅透支,而係其他人歧視嘅目光。有時放工明明沖完涼換好晒衫,就係因為有一身地盤佬獨特黑到好似炭的膚色,令你一上車,其他人就彈開10尺,再加上一個凌厲嘅眼神,話俾你知你同我哋係唔同level。第一次經歷嗰陣時,嗰種感覺真係一試難忘;雖然呢種感覺會慢慢麻木,但係點都係絕對唔好受。


職業無分貴賤?

雖然喺世界上嘅職業真係有高低之分,但係其實社會上每一個崗位都係同樣重要,冇是但一個行業呢個社會都係run唔到。希望所有人都能對其他人有基本嘅尊重。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

[職場故事]我為何選擇「紮鐵」這條路

會計仔:邊個夠我嚟?OT篇

IT人搵工攻略(1):Technical Test

天生廣告人

 

此文章由原作者及jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案