地盤佬日誌：To迷惘的土木工程畢業生
一般嚟講，大學生土木工程系畢業之後都係做工程師，雖然社會上都有啲異數，走咗去做政客（李卓人）或YouTuber（笑波子）等其他職業。等不才嘅小弟介紹一吓，大家畢咗業之後可以有啲咩選擇。
政府見習工程師
政府每年都會請見習工程師。政府對見習生嘅培訓比較全面，有一定嘅地盤及設計機會，對日後考牌同正式入政府（做皇家佬）有一定嘅優勢。當然，見習工程師嘅合約係有別於正式嘅政府工，如果你一定年期內考唔到牌（Charter）係會唔續約。
另外政府都會請技術主任、監工等等，前途唔算特別好，但係都係一個選擇。
顧問公司（乾收銀）
多數顧問公司都係主要做設計（樓橋路隧道等等）同監管承建施工。土木工程有分三個牌：土木、結構、岩土，所以入顧問都要揀其中一個方向發展。
- 土木：主要係起橋、路、隧道，考牌嘅合格率係三個牌中最高，不過因為比較依賴政府畀工程，所以如果政府無出工程就頭痕。
- 岩土：主要係開挖擋土牆等等，考牌嘅合格率係最低，個牌在三個牌中最值錢。
- 結構：主要係起樓起橋，考牌嘅合格率中等。最主要係做計數，OT嘅機會最多。
顧問做嘅嘢都比較理論性同需要合乎法例，對書本知識嘅要求比較高，所以多數人都係畢業頭幾年先至會去做顧問。如果隔得太耐，書本嘅知識都畀返晒老師嘅話，就唔係好適合入去做。
承建公司（大判）或專業公司（分判）
主要係做地盤現場嘅文件同地盤嘅管理，出去踩地盤嘅機會比較多，要同好多唔同嘅人打交道，適合性格外向同喜愛戶外嘅人做，亦都會比較快接觸人事管理。不過最大缺點係比較難考牌（結構同岩土都好難考到，比較多人會選擇考土木）。
其他選擇？
其實仲有其他專業選擇，例如入發展商、入大學教書等等，不過始終唔係話入就入，係要等緣份到。
每個人嘅際遇都唔同，喺事業嘅漫漫長路，第一份工可能對你好重要，又有可能對你毫不重要。不過喺呢一刻，希望大家都可以認認真真咁去思考自己嘅職業方向。
土木工程師工作簡介:
- 工地驗收及施工質量控制
- 協助駐地盤工程師處理日常行政工作及監督地盤工程
港夫‧李奧
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。 |
大專生求職面試全攻略
邊個話讀土木工程一定要做工程師？入嚟睇吓有無咩熱門市場行業係啱自己做啦！
延伸閱讀：
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
