地盤佬日誌:地盤(勞民傷財)的安全措施

地盤(勞民傷財)的安全措施

其實地盤嘅工業意外一直以嚟都有發生,有啲係無可避免,有啲係做好啲安全措施就可以避免。間間建築公司都話安全第一,但係安全就要用錢,有時啲老闆都係口響荷包硬,不過近年啲地盤的確多咗唔少安全措施。


有啲措施真係好有用

其實地盤有啲位真係好危險,的確需要啲安全措施去保障工友:

  1. 有時地盤會預留啲臨時洞用嚟做水喉、電喉,一定要做護欄或蓋好佢;我之前啲地盤就真係有人跌過落去。
  2. 電動切割工具要有護罩,年中唔少師傅嘅手指就係斷送喺佢手上。
  3. 高空危險位置嘅獨立救生繩、吊具等,必須定期由專業人工檢查。


有啲措施真係好戇居

相比之下,某啲公司嘅某啲安全規定就真係幾弱智。例如有啲地盤要求所有功夫櫈(半米高好像櫈仔的小型工作台)都要四邊有護欄,其實有時嗰啲位置本來都唔算唔安全,但係又會令到師傅做嘢好唔方便。其實用功夫櫈同你喺屋企企喺櫈仔上面換燈膽一樣,你會唔會咁樣都加個護欄呢?加咗真係會安全啲?

又例如有啲地盤全面禁止使用A字梯,同埋臨時工作平台唔準過夜等等,都係用多咗錢、用多咗工期,但係安全成效不大。


牛奶仔的安全理念

點解近年會有咁多近乎弱智的安全規定?主要原因有幾個,包括有啲安全官唔想孭鑊,所以不停要求其他人交文件同埋搵人簽名;另外就係有啲牛奶仔(冇乜做過地盤嘅人)高層憑空幻想出嚟──佢哋根本唔知道地盤實際點樣施工,所以諗咗啲根本做唔到,或者做嚟都無實際作用嘅離地安全措施。


點樣先會安全?

地盤要安全,其實最重要係師傅有安全意識,同埋地盤一定要做好安全設備。地盤危機四伏,條命係自己嘅,但工作就永遠做唔完,做快咗都只係公司賺錢。師傅們工作要萬事小心,千祈唔好貪一時之快而罔顧工業安全。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

 

檢視此作者的所有文章

 

延讀閱讀:

地盤佬日誌:地盤佬的快樂新年

地盤佬日誌:澳漂工程佬

地盤佬日誌:有汗出,要有糧出

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案