女人當自強?「29+1」香港女性面對的7大財政壓力

女人當自強?「29+1」香港女性面對的7大財政壓力

「29+1 」對於好多香港女性嚟講都係一個好可怕嘅數字。女人好似一到咗3字頭,就需要面對多方面嘅壓力,包括財政壓力、工作壓力、感情壓力、家庭壓力、朋輩壓力、荷爾蒙嘅變化、外型嘅變化、膠原BB嘅流失等等。

不過,如果睇過「29+1」嘅朋友,就會明白到3字頭其實只係另一個 Saturn Cycle 嘅新開始,而呢啲壓力只不過係你「升呢」之前要打嘅大佬。只要活出自己,3字頭又如何?為人生作好準備,係所有人都需要為自己盡嘅責任;而為自己嘅財政負責,係其中一個關鍵。你,準備好未?


1. 保養

保養係每個女人必須做嘅事情。除咗保持個靚樣、少女嘅身型,健康嘅體魄亦當然唔少得。美麗係女人嘅終身事業,當中包括美容、護膚、按摩、中醫調理、保養品、運動等等。雖然平有平做,貴有貴做,但係如果要晉身靚女行列,呢個會一定要供。平則一年費用要3至5萬,貴則可以去到10萬以上。所以,每個月出糧嘅時候,扣除必需嘅開支,一定要留一筆比自己做保養費。


2. 買樓

如果獨立生活又唔想無啦啦被業主逼遷,有返咁上下工齡嘅女性都會希望買返個單位,有一片屬於自己嘅私人空間。香港樓價高企係不爭嘅事實,更係全球最難負擔城市之冠,要不吃不喝約18年才可置業。想打破宿命,就要努力搵錢同儲錢。閒時睇下樓,為自己鎖定置業目標,先有機會早日達成願望。


3. 醫療

萬一你或者你家人咁唔好彩健康出現問題,即使你選擇公立醫院,醫療以及養病都會係一筆龐大嘅費用。香港嘅公營醫療體系面臨逼爆,有財政能力嘅人會轉投私人醫療機構,呢筆開支可以好龐大。事實上,衛生處嘅報告亦指,香港人去年嘅人均醫療開支超過15,000元,而呢個數字只會一直上升。所以點都要儲定一筆嚟應急。


4. 結婚生子

結婚生子係「29+1 」一個好大嘅迷思。如果有幸遇到個Mr. Right,除咗要供養雙方父母之外,仲有可能會孕育下一代,當中需要嘅預算都要數以十萬甚至百萬計。喺物價高企嘅香港,結婚開支龐大,好多時都要由男方同女方一齊分擔。準備生仔嘅話,如果有能力又希望服務比較貼心,想搵間私家醫院生,又係一筆開支。所以做女人最理想係可以隨時預備一筆30至50萬嘅緊急資金(emergency fund),以備不時之需。


5. 保險

呢度儲一筆、嗰度儲一筆,咁咪會有好多現金放喺銀行貶值囉?除咗穩健嘅投資,保險亦係其中一條出路。即使香港有不少公司都有包辦醫療保險,但保額未必足以涵蓋全部開支,需要購買額外嘅保險保障自己。而隨著年齡增長,某啲項目嘅保費隨之增加,財政壓力亦會相對增加。

保險種類五花八門,住院、危疾、家居、人壽、儲蓄等包羅萬有,要小心了解保險範圍,先可以將啲錢花得其所,並確保自己往後嘅生活得到保障。


6. 旅遊

香港人出名鍾意旅遊,除咗同姊妹結伴同遊之外,有啲人仲會選擇嚟個進修加旅行嘅遊學之旅,去增值自己同時拓展人脈。旅遊嘅洗費豐儉由人,無論你想去嘅係東南亞定非洲,首先都係努力咁儲錢啦!


7. 退休

香港嘅平均退休年齡係65歲,即代表你由30歲開始,就剩返35年嘅時間準備退休。香港嘅生活成本逐年上升,統計處最近一份退休住戶開支調查亦指出,退休人士嘅每月平均開支高達22,600元。屈指一算,唔計通脹,若我們以90歲為限,就需要至少678萬的退休儲備。即使你嘅強積金投資能夠幫助紓解一部分壓力,如果唔先作準備,就好難喺退休後保持同樣嘅生活質素!


「29+1 」係一個分水嶺。有女性選擇結婚生子,有女性選擇遊戲人間,亦有女性決心創一番事業。無論你選擇邊種人生,都務必要理財,因為穩健嘅財政係財務自由嘅基石。

自從畢業之後,你有無好好咁為自己將來打算過?有的話就請你繼續堅持,如果無的話就趁 「29+1 」呢個新Saturn Cycle,為自己嘅將來鋪一條康莊大道。

 

本文由信貸資料服務機構環聯提供

檢視此作者的所有文章

 

延伸閱讀:

男人唔可以窮?N個「29+1 」香港男性面對的財政壓力

職場新鮮人理財3招

好人無好報 – 「職場好人」較低人工

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案