如何搣甩Fresh Grad味?6招讓你在職場脫穎而出

如何搣甩Fresh Grad味?6招讓你在職場脫穎而出

夏天除咗為大地帶來雨水同美腿外,亦同時帶來一班壯志雄心嘅職場新丁。踏入 8 月,相信唔少Fresh Grad都已經搵到人生中第一份工,獻出咗寶貴嘅第一次畀公司。

作為一張職場白紙,好容易畀人呆呆笨笨,唔得醒目嘅感覺。查實我哋個個都做過新丁,初嚟報到,好多嘢唔識/唔熟都係非常合理,好多比較Nice嘅Manager對新人嘅容錯率都會特別高,但呢段蜜月期總有完結嘅時候,點樣先可以盡早擺脫一陣陣嘅Fresh Grad味,喺職場殺出一條血路?


1. 學識點用Email

唔係講笑,其實好多人都唔識用Email,見過唔少Fresh Grad甚至乎唔Check Email添。工作時好多流程都講求合作傳波,有時啲Email有後續Action等你覆,你應少一次機就會令後面個同事都生產停頓。當你未了解整個運作流程時,記住同隔離位同事了解吓。另外Business Email用語同平時Casual Talk都有啲唔同,唔想格格不入就上網爬吓文喇。


2. 開會咪玩手機

可能你會覺得自己係新人,開會有好多嘢都唔關自己事,但如果你係一個閒人又點會叫埋你開會先?叫個新人去開會,除咗想你喺會議中多聽、多學習之外,最重要係想你幫手記吓嘢,所以收起部手機玩少2分鐘啦。


3. 記住辦公室所有人嘅名

無論公司大定細,就算你嘅職位好獨立工作,都好需要同事嘅提點。初到新地方,難免有份陌生感覺,主動啲融入同事一齊食吓飯啦。一次生、兩次熟,絕對可以幫到你了解公司唔同部門嘅運作。


4. 收工前熄晒你嘅辦公設備

請緊記同事們唔係你阿媽,冇手尾係Fresh Grad大忌,如果你係最後一個離開Office,記得熄冷氣同燈呀。仲有,用完會議室/辦公室/茶水間物品記住放回原位,畀人點名、留下港孩壞形象就唔好啦。


5. 控制同舒緩負面情緒

人嘅情緒可以影響好多嘢,包括你嘅言行舉止、你做嘅決定同人哋點睇你。如果你成日放負,往往有問題發生嘅時候唔去積極諗點解決,而係陷入指責、推卸同抱怨Mode,隨時同事會想疏遠你,上司會想剷走你,你嘅伴侶都會想離開你。請緊記冇人會敢派重要任務畀阿愁同阿躁㗎,集中精神處理同解決問題先係重中之重。


6. 切忌踢一腳郁一下

唔少Fresh Grad身上都散發住一陣青葱校園求學味,意思係好似仲做緊學生咁,坐喺度就自然會有人安排好全日時間表,到時到候有Reminder。嚟到職場,其實好多人都忙到甩碌,花到時間出嚟Brief你已經好有心。話到明係Brief,梗係淨係講個大概,其他嘢就靠你主動去摸索同發問啦!切忌做老爺錶,要上鏈先識行,千祈唔好做完一樣就停咗喺度,或者開始玩手機同淘寶,會畀人感覺唔夠投入同被動。所以,試吓主動了解上司要求同研究吓週邊任務啦。


以上6點可能聽落好似係手板眼見功夫,但係如果連基本嘢都做唔好,上司就更加唔放心將重要任務交畀你做啦,你話係咪?

 

本文由人力資源顧問公司Six People Map提供

檢視此作者的所有文章

 

延伸閱讀:

[不要再說了]5個打工仔「摟打」詞語

如何利用jobsDB profile更快搵到好工?

求職面試:10個自我介紹形容詞

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案