還記得自1993年至2005年，黎明拍了一系列和記電訊廣告，由黑白電話到彩色手機，曾蒲過頭嘅手機品牌好多，可惜到今日差唔多全部消失晒嚕。遠古記憶中那些Motorola、Nokia、Sony Ericsson、HTC⋯⋯到底去了哪裏？當年雄霸一方的大公司至今也漸漸縮減規模，甚至轉換業務。
成日話工種會俾AI取代，其實另一面佢都幫緊大家製造就業機會，減少人同工錯配機率﹗呢件事係點發生？去片解畫啦﹗ |
Motorola 從龍頭變被收購
「是你嗎？手執鮮花的一個⋯⋯」和記天地線的系列廣告中的電話多由Motorola負責製造。Motorola曾經係美國最偉大嘅公司，一直以創新發明為人稱讚，由收音機起家，喺1983年推出了世界第一個移動電話──DynaTAC8000X。從此，改變人類歷史！1994 年，美國市場 60% 手機都係由Motorola製造；1996年推出了翻蓋手機StarTAC，只有88克重，驚艷整個世界，難以想像嘅輕、巧、小。好景不常，愈來愈多企業投入手機行業戰場，Motorola喺手機上不能繼續創新，被Nokia取而代之，成為世界上最大嘅手機製造商。之後持續走下坡，2004年Razr手機曇花一現，風靡一時，頭兩年銷售了 5,000 萬部，但旋即沉寂，發展停滯，時代的洪流怎會放過沒有因時而變嘅公司或者人呢？
2004年和蘋果合力開發Motorola iTunes 手機──Rokr，明明都己抓到改變的尾巴，但就係不懂得抓緊智慧手機嘅黃金發展機會。即使苦苦掙扎，2009年起陸續推出智慧手機：Milestone、Droid、Defy ME525、Atrix等，仍無法力挽狂瀾。Droid推出初時銷量超過iPhone，小編當年也入手了一部，用了1年後就極為後悔，軟件配套太差，不禁懷疑自己：「點解要年少氣盛抵制iPhone？」。留不住用家的下場係：世界第一嘅公司分拆成兩間，手機嗰間（Motorola Mobility LLC）喺2011年被Google收購。
▪ 投訴電話7成燥底 一接通即問候父母 電話客服員：但最怕其實是鹹濕電話
▪ 又爆mon？手機維修師傅靠YouTube自學接job 坐鎮快餐店 10分鐘救機
Nokia 一成不變嘅過錯
小編第一個手機係Nokia 3310，當年準備升中學（哎呀，暴露年紀喇！），得到電話簡直係阿媽皇恩浩蕩。Nokia嘅黃金時間係1998年至2006年，成為全球最大的手機製造商，1999年嘅市場佔有率持續增加，達到27%；2003至2006年達到頂峰，全球市佔率高達四成以上。
想當年，Nokia 手機啲顏色好豐富，同一款手機有多種顏色，設計簡約又有型。蕉王8110炒至天價，之後嘅8210更係突破，體積細小之餘，仲可以換殼，幾乎人手一部Nokia，極受追捧。真正落敗起點是2007年iPhone推出後，睇悶咗Nokia手機嘅大眾即時轉軚，當年手機銷情直線下跌。此後5年公司市值下滑將近96%。當Nokia終於醒覺智慧手機嘅年代已經來臨，2011年宣布同Microsoft合作，推出以Windows Phone為作業系統嘅手機時，為時已晚。2013年，巨人Nokia被Microsoft收購，雖然至今仍有推出手機，但就無咩人用啦！
Sony Ericsson 一個停步就消失人前
呢個牌子嘅手機，印象最深刻係Walkman系列，簡直係又潮又型的代言。由Sony及Ericsson兩大公司合併而成，前者人人都識，以影音、電器等聞名全球，但手機業務就好遲先入場，一直發展緩慢。後者一直在發展手機業務，90 年代一直保持着30%的市場估有率，可惜2000年錄得巨額虧損。兩者一拍即合，2001年合併，2年後推出的T610，全球熱賣。
2005年又推出Walkman系列手機，W800真係令人大開眼界；另外又有CyberShot 系列，K800嘅影相效果，廣受用家稱讚。一系列精緻手機令公司由全球第6名上升至第3大手機品牌。小編人生第2部手機就係W910，至今仍記得當時嘅沉迷，恨不得無時無刻都戴着耳筒聽歌。大好前景在望，可惜遇上2009年金融海嘯，公司出現嚴重虧損，市佔率退至全球第5。2011年底Ericsson退出手機業務，得番Sony孤軍作戰，呢一兩年間嘅停止進步就注定咗成敗。時至今日已完全消失人前，基本上無人在用，除了古天樂喺2017年被網友發現仲用緊 09年出嘅 Sony Ericsson W995。哈哈！
▪ 萬事起頭難？七成Startup失敗收場 前員工：「計劃永遠趕不上變化。」
▪ 香港的Fintech到底落後了幾多？金融科技實現無現金社會、開創各種交易服務
HTC 做錯決定難翻身
來自台灣的HTC紅得比較後期，2006年才成立，直接主打智慧型手機， 憑Touch Diamond 在國際打響知名度。最輝煌嘅時間應該係2008至2011年，08年推出全球第一款 Android 手機，內建 Gmail、Google Map等多項服務，令人嘩然，大舉拇指。HTC行「機海戰術」，每年推出嘅手機產量驚人，曾榮登美國市佔第一，2011年公司市值高達 338 億美元，勁過 Nokia。
發展到2013年，手機競爭漸趨激烈，高階如Apple、Samsung、LG、Sony，低階有小米、華為、OPPO 等，強敵環伺，HTC競爭力持續下降。重點係，當時嘅董事長決定發展VR（虛擬實境）業務，希望為公司注入新生命。一個錯誤決定，HTC投注大量資源喺VR，暫停咗手機硬體嘅創新和研發，以至於呢幾年間慢慢消聲匿跡。雖然至今仍有手機推出市面，但風光不再。2019年新上任的行政總裁Yves Maitre表示未來會研究推出高階的5G手機，這個決定是真或假，又能否扭轉局面？大家拭目以待嚕～
變幻才是永恆 不進則退
Nokia喺2013年宣布手機部門業務賣給Microsoft時，當時嘅CEO曾經咁講：「We didn’t do anything wrong, but somehow, we lost.（我們沒有犯甚麼錯，但不知為何，卻輸了。）」世情的確如此！唔係你有無做錯，而係有無適應時代嘅變化和腳步。世事每天都在變幻，消費者的口味、科技的流行、世界性的金融格局⋯⋯無論這一刻多偉大，也有被撼動的一天，無論係公司定係公司裏面嘅打工仔，適者生存，唯有裝備自己，將目光放遠，把握每次幻變的契機。
此文章由原作者及jobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及jobsDB保留採取法律行動的權利。
Increase your chances of getting hired. Create a jobsDB profile
Increase your chances of getting hired. Update your jobsDB profile
