恨死香港人的公司假期福利

恨死香港人的公司假期福利

香港僱主出名刻薄到冇朋友,搞到議員要拍hehe廣告爭取7天侍產假,一年有得放一日生日假都要謝主隆恩咁濟。反觀不少國家已經推行緊女士生理假(每個月都有得放)、長期服務假(通常指連續受僱10年後可放8星期以上有薪假期)呢啲福利,真係恨死香港打工仔。

除咗法定假期之外,好多公司都會提供啲古靈精怪嘅假期福利,慰勞一眾辛苦搏殺嘅員工。香港嘅老細睇住啦!


戶外活動假

戶外活動裝備品牌REI鼓勵自己啲員工玩埋一份,每年都會俾兩日「Yay Days」俾佢哋放假出去癲,行山露營馬拉松激流玩乜都得。

至於滑雪裝備品牌Burton,除咗落大雪之後俾佢哋放「Snow Days」去玩之外,仲送埋滑雪場通行證俾佢哋添,超正!

員工興奮度:★★★★☆


義工假

雲端服務公司Salesforce每年提供7日有薪假俾員工做義工,如果佢哋用盡哂咁多日,公司仲會送1,000蚊美金俾佢哋捐俾自己選擇嘅慈善機構。

員工興奮度:★★★☆☆


寵物喪假

寵物陪住我哋幾年甚至十幾年,就好似親人一樣。英國唔少公司都有提供寵物喪假,而美國近年都開始引入,俾員工休息幾日,等佢哋可以從傷痛中恢復。

話時話,佢個福利有冇指定邊啲動物?我條錦鯉死咗可唔可以申請呢?

員工興奮度:☆☆☆☆☆(我想旺財返嚟陪我多啲ToT)

恨死香港人的公司假期福利



星期五假

你冇聽錯,WWF(世界自然基金會)俾員工隔週星期五放假,叫做「Panda Fridays」,因為可以俾員工喺週末充分休息,返工時會更專心同有衝勁,又可以減低碳排放喎。佢哋仲話如果做唔切啲嘢,會好自律咁喺公司OT,或者星期五喺屋企做㗎。點解香港啲議員同老闆會覺得設立標準工時都可以降低競爭力嘅呢?

員工興奮度:★★★★


打機假

如果你明知班宅男下屬今晚打死都要通宵打機,第二日返工生產力係零,你會唔會俾佢哋放假?尋日《Pokémon GO》喺香港隆重推出,有手機app公司恩准同事放半日假捉小精靈,總算為香港老闆爭返一分啦!其實打機假歷史源遠流長,台灣網站公司蕃薯藤喺《暗黑破壞神III》推出時,就發出咗呢個咁體恤員工嘅放假通知:

恨死香港人的公司假期福利

(image via Yam蕃薯藤)

而2013年《GTA V》推出前夕,亦流傳美國一間遊戲專門店嘅放假告示,因為預計啲客人(同店員)會留哂喺屋企打機:

恨死香港人的公司假期福利

(image by Mulle via Know Your Meme)

不過佢哋Boxing Day就冇假放啦,因為要俾啲細路收到公公婆婆送嘅game之後拎返嚟換喎。(笑)

恨死香港人的公司假期福利

員工興奮度:★★★★★(不論機迷或非機迷)

 

資料來源:
City A.M.: “The 20 best perks firms like Netflix, Spotify, Facebook and Google offer their employees” (3 Feb 2016)
abc NEWS: “Companies Offer Paid Pet Bereavement Leave to Employees” (18 May 2016)

 

延伸閱讀:

10個假期英文,你點可以唔知?

被解僱,可能是人生寶貴的轉捩點

Six Warning Signs: How to Spot a Bad Company 

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案