情人節晚餐:侍應8個OMG Moments(1)

情人節晚餐:侍應8個OMG moments(1)

就嚟又到一年一度閃光彈核爆嘅大日子──情人節,各位大少爺一定想同心儀嘅女神BB共度一個浪漫嘅晚上。之不過,好多情郎BB唔係成日食開西餐,有好多細緻位一做錯咗呢,除咗令一眾侍應反晒白眼之外,仲分分鐘喺女神心目中扣晒分呀陰公。結果失威之餘,又無派彩,就變咗雙失情人節啦。

店小二在此提醒各位,想成功偷走女神BB嘅心兼抱得美人歸,就咪踩中以下8大情人節食西餐地雷:


OMG 1: 無BOOK扮有BOOK,以身試法做傻豬

話說情人節好多餐廳都需要客人落訂或者畀足錢去確認訂枱,除咗用嚟防止好多Book住先嘅大少爺之外,仲會減低甩booking嘅機會,令到餐廳達到最佳入座率賺最大嘅錢。

不過,總會有好多傻豬情郎BB唔知個「女朋友」係咪尋日先識嘅,無訂枱走嚟扮有訂枱,仲講到實牙實齒話一早打咗過嚟乜乜乜又話係個女人聽電話(其實聽電話嘅唔係女就男㗎啦)⋯⋯當發現原來你根本唔知個Set食乜,又唔知要畀Deposit,仲要你聲稱Book咗嘅時間根本唔存在有得選擇⋯⋯係人都知你係Walk-in搲枱啦。

嗱!面就人地畀,架就自己丟嘅。唔想第一次約會紅牌出場,真係勸勸各位情郎BB穩穩陣陣乖乖豬去訂枱啦!


OMG 2: 靚枱在乎畀訂日期

好多朋友仔都誤會咗:「我神咁早訂枱先,實有靚枱啦!」其實好多餐廳都會睇你畀訂日期多過你預訂日期。而作為Receptionist嘅我,亦都最憎三催四請死都唔畀訂又要人留枱嘅人㗎啦,靚枱真係畀唔到你囉!加上,如果到時傻仔客人嚟嘈問點解人哋有靚枱自己得核突枱,我哋又可以大條道理話:「先生,靚枱嗰啲客人係成個月前畀咗訂㗎啦,你都係早幾日訂,真係唔好意思呀。」佢仲唔喺女神BB面前乜架都丟晒!

Anyway,切記呀!Request唔代表你Guaranteed一定有靚枱㗎傻BB!


OMG 3: 留意當日餐牌及收費安排

情人節又名「男士破產日」,當日餐牌就算無勁貴嘅Set,最起碼都一定有個最低消費。如果係只提供情人節Set嘅餐廳,朋友仔真係要留意吓女神BB或者自己有無對Set餐牌入面嘅食物有敏感或者唔食得,事關到當日先要求轉係有可能轉唔到㗎。

試過有位傻豬豬嚟到先話對海鮮敏感,但成個Menu唔係生蠔就係龍蝦、帶子,而我哋又真係同客人Confirm過個Menu,難道你覺得個廚師係位魔術師喺情人節呢啲冧檔日改到3個Courses畀你咁威豬?咁佢應該去美國Vegas表演而唔係喺度煮嘢食啦。到最後對客人只可以離場去食M記慘慘豬囉。


OMG 4: 大型禮物有擺喺地下嘅危機

好多朋友仔都好鐘意買大大件嘅禮物,畀女神BB打卡同帶住行街威威豬,不過你要明白唔只你一位會咁做,而且香港寸金尺土,餐廳實在無太多多餘嘅位置,去存放你大大隻嘅啤啤熊或者嗰99枝烈火玫瑰。

試過有位情郎BB拎住大大紮嘅花嚟,我哋已經安排咗個酒桶畀佢擺,點知情郎BB嫌個位唔夠安全,問我哋有無Locker借畀佢,真係借條毛畀你。最後,因為佢驚人哋偷佢啲花嘅關係,都係死死地氣放返喺自己位嘅地下。


以上就係情人節之前要注意嘅事,至於大日子當天有咩要留意呢?記得密切留意「侍應8個OMG Moments(2)」!
  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

地盤佬日誌:澳漂工程佬

會計仔:如何讓會計同事愉快地為你做事

IT人印度出trip記

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案