情人節晚餐:侍應8個OMG Moments(2)

情人節晚餐:侍應8個OMG Moments(2)

各位情郎BB睇完「侍應8大OMG moments(1)」,有冇好好準備前期工夫呢?但係唔好忘記,喺大日子食飯嘅時候唔小心做錯啲醜事,一直辛苦Build up嘅形象一樣會喺一瞬間盡毀……千祈唔好做嗰位濕滑的司機同埋嗰條粗心大意的道路喎!注意埋下面呢4個重點啦!


OMG 5: 餐桌禮儀亂咁嚟

我明白好多朋友仔都未必成日有去食中檔或者高檔西餐嘅經驗,但情人節就想同女神BB去試吓啲Fancy少少、有靚景嘅餐廳。其實餐具不外乎由外食到內,再基本就係細刀叉食頭盤、大刀叉食主菜。想話畀侍應知收得碟、已食完,就可以將餐具拍埋放喺碟上面,確保餐具頭指向碟嘅11-12點方向。

唔好發老脾問人點解食完頭盤唔收你用過嘅大刀叉,反而收走你無用過嘅細刀叉呀。因為你用錯咗囉豬豬。


OMG 6: 特別日子通常沒有任何折扣

以餐廳嘅角度嚟講,雖則情人節唔係公眾假期,之不過佢嘅重要性同平安夜、聖誕節一樣!喺呢啲特別日子,通常唔會做任何折扣,哪怕你係幾VIP或者係乜乜會員,所以⋯⋯更莫講話咩你生日或者今個月生日去搲個甜品。我哋只會笑住送你一句:「情人節快樂/生日快樂囉!^^」

情人節係表現自己嘅機會,喺女神BB面前就豪多少少啦!對不對?


OMG 7: 胡亂裝帥晒錯雞腸

話說好神奇地,過去好多年嘅情人節,好多情郎BB都好鐘意過份表現自己,走去同我哋講英文,嘗試用呢個方法去為自己加分,不過大多都換嚟無限扣分。建議各位朋友仔如非流利,請唔好嘗試同侍應用英文落單。我並非話你英文能力低,只係我哋對餐飲嘅英文能力比較好。

例如諗住叫牛扒嘅話,就先學下點叫牛扒成數,五成Medium,七成Medium Well,唔好講咩50%或者嚟個65%;或者人哋問你紅酒要Sweet啲定Dry啲,你答人要Red;或者人哋問你要Still 定Sparkling Water,你答人話今晚渣車唔飲酒,真係唔笑死我都笑死女神BB㗎啦。


OMG 8: 畀Tips都要畀得好睇

可能有人話我有私心,不過其實畀Tips真係可以顯出個人教養,咁當然前提係Service夠好,值得你嘅打賞啦。作為女性,如果知道我約會嘅對象識餐飲禮儀,又對人有禮貌,畀得起餐飯之餘,仲會有錢打賞伙記,啲印象分仲唔爆晒標!!

朋友仔如果畀Tips,可以畀大概$20-$50,最好畀現金,事關寫Tips喺簽卡單度,女神BB可能睇唔到㗎嘛!咁如果找錢找返幾蚊雞就豪豬少少,拎晒啲硬幣換張10蚊/20蚊都好,留得1蚊雞Tips不如你拎嚟儲錢買樓啦吓


各位情郎BB如果能夠避免以上8個錯誤,咁我哋就Serve得開心,女神加分!祝大家都有個浪漫美好嘅情人節!^^
  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

情人節晚餐:侍應8個OMG Moments(1)

地盤佬日誌:澳漂工程佬

會計仔:如何讓會計同事愉快地為你做事

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案