想同人講自己個仔做CEO,其實唔難

想同人講自己個仔做CEO

(Image by 甘寧老師 via Parenting Headline)


最近有家長級專欄作家發現,有機構開辦名為「未來CEO成長訓練營」嘅課程喎。嗚哇,媽媽們見到呢個廣告,仲唔流哂口水。做醫生、律師已經過時啦,宜家只需要參加課程,就可以俾仔女贏在起跑線,第時同啲親朋戚友、三姑六婆講:「我個仔係CEO呀」,仲唔吐氣揚眉,光宗耀祖到嘔。

至於各位後知後覺,唔係一月出世,冇學八國語言同各類樂器,未起跑已經輸咗俾啲K3小朋友嘅讀者,唔駛咁灰心嘅,其實只要揀啱career path,你都可以大大聲同人講:「我係CEO!」﹝或其他C-Level高層﹞

CEO = Certified Electronic Operator

作為一個註冊電工,你嘅工作同人嘅生活息息相關,細至一盞燈,大至整個城市嘅電力供應系統,冇咗佢哋人類會滅亡㗎。

COO = Cargo Operations Officer

你可以同人講:我日日都要管住幾百億(嘅貨)㗎,不知幾大壓力呢。

CFO = Check Facebook Officer

宜家間間公司都話要social media marketing,check Facebook一定係最潮嘅職業。

CMO = Cash Management Officer

冇咗佢哋,銀行可以收得皮。

CIO = Customer Information Officer

iBank呢個位好似好高薪(如果你入到)。

CTO = City Ticket Officer

消滅違例泊車嘅重任就交俾你啦!

 

老土講句,正所謂「行行出狀元」,只要份工係正當職業,養得起自己,對社會有貢獻,自己又做得開心,咪係一份好工囉!唔一定要做啲C乜乜C物物嘅!(媽媽們唔好圍插我)

 

延伸閱讀:

做個成功的職場教練

出現這10大徵兆,可能代表你是時候轉工了

職場迷思:唔OT就代表不求上進?

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案