想唔撈創業?停一停,諗一諗!

Quit成日有人話要活在當下,行自己鍾意嘅路;亦有人話,追夢完全不切實際。有唔少打工仔寧願放棄高薪厚職,明知蝕大本都要創業。亦有人唔敢踏出第一步,雖然每日返工似行屍走肉,想脫離老細魔爪但又驚冇咗固定收入,搞到心大心細。到底你適合瀟灑唔撈自立門戶嗎?睇吓以下條件你符合幾多項?

1. 極度自律,唔怕做阿四

平日返工時,老細行開果陣你會唔會乘機「蛇王」?或者成日諗朝早唔駛返工、夜晚唔駛OT?如果你從來冇咁嘅日過日心態,做事有幹勁,你或者有做老闆嘅首要潛質 — 即使在零監督的情況下,都絕對唔會懶懶散散,千祈唔好諗住做老闆可以日日瞓到晏晝又可以早收工,事實上為了生意,分秒必爭,你又要唔介意做阿四,事事親力親為,咁先可以有足夠的耐力同鞭策力捱過創業最初的艱巨時期。

2. 忽發奇想,天馬行空

如果你隨時隨地個腦都彈出一些新奇構想,充滿天馬行空的意念,千祈唔好以為咁樣好無聊。突圍而出的創業者都係靠食腦,撞橋撞出好idea,唔好怕人笑,你已經有獨特條件,落實執行吧,人生只有一次啊!

3. AQ爆標,跌落谷底冇有怕

大部分人在創業的過程中總會跌跌撞撞,弄得一身焦頭爛額。當面臨逆境時,是考驗抗逆能力的最佳時刻。若自問是AQ(逆境商數)爆棚,就算跌落谷底變得一無所有,俾人一沉百踩都仍可自嘲兼一笑置知,堅持爬番起身,咁創業路當然難唔到你。

4. 危機迫近都唔會打亂陣腳

好多人以為創業等同自己話晒事,一切自己作主。其實創業者會隨時面臨突發危機,而創業初期好多時one man band,冇人可幫你。例如有強大的競爭者出現、產品對顧客造成損害、供應商突然結業或合作夥伴不和、資金周轉不靈……當危機殺到埋身,你可以保持冷靜,實行應急措施嗎?

5. 面皮要幾呎厚

當你再唔係代表某大公司的職員,而是自行開拓商機,你本人就係一個活生生的招牌,當你透過唔同途徑推廣產品或服務,就預咗未必個個Buy又要卑躬屈膝hard sell。一旦被人批評,甚至面對別人口出狂言睇唔起你,你仲可以瀟灑放下,繼續輕裝上路嗎?