想搵份合心意的工作?秘訣是……

Dream job

係人都想搵到份dream job,人工高福利好,又係自己興趣,但成功從來冇捷徑﹗好多人在搵工過程,連邊份工啱自己都未摸得透,嗰幾年hit就一窩蜂爭住做,為咗嬴取三姑六婆嘅美譽,三分鐘熱度就知唔啱自己,結果職場兜兜轉轉。到底點先可以衡量邊份工啱自己?

自我評估

有些人明明眼前有好多工可以選擇,但總係心大心細,唔知自己想點。所以,最緊要問清楚自己——想做什麼?有能力做什麼?要認真進行自我評估,不單止了解興趣和能力,還要洞悉自己的真正需要。例如畢業生可能純粹想汲取實戰經驗,職場老手卻想在大公司展拳腳,亦有人只係想搵份工養家糊口。

一旦你了解自己的真正需要,便要找出你的市場價值。這些價值包括知識、技能、經驗及潛質。有唔少打工仔人工過低,成日覺得市場上的薪酬報告不能反映現實,這些機會不是屬於自己云云,有否想過最主要原因係唔知自己的市場價值?當然亦有求職者因高估自己而找不到心儀工作。要避免這種情況發生,搵工前必須做足資料搜集,例如上網搜尋類似職位的人工水平,徵詢朋友或人事顧問對你資歷的評價。

有哪些地方不能讓步?

搵工前,先想想有哪地方是不能讓步的,會有助縮窄範圍。例如月薪不能低於20K,要五天工作等。資深打工仔可列出過往做過的工作,然後寫上你揀選工作或決定離職的原因,透過這個過程,便容易列出不能讓步的條件。

擴闊搜尋範圍

不要局限於單一途徑搵工,除上網外,更可大膽嘗試walk-in、自廌、搵人介紹。亦不要局限地區環境,只選擇甲級寫字樓上班,如其他地區有筍工可尋,不妨考慮一下。若然你做開大公司,也可留意細公司有冇你想做的職位空缺,細公司可能冇咁多掣肘,令厭惡辦公室政治的你更自在,發揮更好。

慢慢搵,唔好急

雖然就業市場競爭激烈,並不代表有工請就返。不費吹灰之力得手的工作,通常並不理想。若然你花了一段時期也找不到工作,不要氣餒,要知道,好工可遇不可求,有好多人在找到合心意的工作前,都經過多番折騰。另外,有些人以為漁翁撒網定能找到合心水的工作,但事實上所花費的精力和成效不見得成正比。因此,重質不重量才是最明智的。

想尋找你下一個機遇? 立即瀏覽jobsDB最新職位