創作人畢明專訪(二):想進步,必先夠「八」不斷作新嘗試

4作為廣告人、傳媒人、影評人、導演,創作人畢明同時兼顧多重身分,要勝任多重角色,究竟最關鍵的要素是什麼?當中又有什麼難度和挑戰?

 對追求新知識要達到飢渴程度

「首先你要有強力嘅自我迫害傾向,唔好俾自己喺某個崗位過得太舒服;加上要夠八卦,對好多事物都要真心鍾意,咁先會不斷努力,嘗試唔同新嘢,兌換更多成果。創作會涉獵唔同範疇,所以文化、電影、書籍都要通通接觸,要經常做research。除此之外,仲要保持謙虛態度,要好似Steve Jobs嘅人生觀—“Stay hungry. Stay foolish.”。你永遠對知識要有一種飢餓感,先會有更多新動力去追求原本你冇嘅嘢。其實資歷越深嘅人,對自身行業越容易感到厭倦,係一種攰,我成日同人講:你唔好狀態發肥!唔好俾資歷折舊,要不斷保持住好Fresh嘅感覺去做自己嘅工作,俾自己有更新嘅動力向前邁進。」

踏進新領域,用自己Skill set摸出一條路

除執導外,畢明與何韻詩聯手製作《十八種香港》,為何會參與這個全新項目?「其實我之所以挑戰新領域,係唔想局限喺廣告呢行發展,從事唔同行業嘅人或多或少都會對自己嘅工作感到厭倦,但如果要踏入新領域又會覺得眼前有一百個問號同恐懼,我覺得係冇必要,你只需利用自己已有嘅Skill set去邊試邊做。尤其創作係需要經常應變同搵出解決方案,要從一啲未知嘅東西摸出一條路,就係創作嘅基本心法。」

發掘本地有才華嘅人,俾香港一個機會

畢明擔任《十八種香港》的創作總監,角色跟以往所做的有什麼不同?「雖然係重操故業,不過今次比較辛苦,因為要喺地區做文化上或者音樂上嘅創作,要由零開始。同做廣告一樣,我們將何韻詩當成係一個品牌,呢個品牌幸好冇框框限制,相對自由度比較高。」畢明認為香港社會近期經歷好多變化,好想為這個城市出一分力。「我們搵咗一啲創作人,專門發掘香港各地區嘅特色,令每一區都充分展現其獨特力量。有好多人成日埋怨香港有好多不足嘅地方,實情係大家有冇俾香港一個機會?有冇發掘有才華嘅人呢?我們透過發掘本地人才,為呢個project賦予全新意義,感覺相當有意思。」

(待續)

同場加映: Project Lucida – 畢明香港城市大學講座: Thinking out of the box