厚皮?薄皮?應付唔同「吋數」面皮,你自有一套﹗
應付唔同吋數面皮你自有一套﹗ 

面皮人人有,分別在於厚定薄。有冇留意身邊同事,有啲面皮幾呎厚,自我感覺良好,「羞恥、慚愧」呢類字眼係唔會喺佢哋嘅字典度出現;至於另一類面皮紙咁薄,對人對事都極度敏感,郁啲都驚佢受唔住會崩潰。面對呢兩類辦公室極端份子,有咩板斧搞定佢哋?

面皮幾呎厚—咪俾佢抽水

面皮厚嘅族群總會不擇手段爭取對佢有利嘅事,無視任何人嘅感受,亦懶理指指點點。以下為厚面皮嘅經典特徵:

  • 上司讚你條Team做得好,佢會話全靠佢度到條好橋(實際開會時發夢遊魂)。
  • 逢親有飯局佢梗會蒲頭,食飽側側膊唔俾錢。
  • 做錯嘢永遠第一時間話:唔關我事架,或千百樣開脫藉口,用廢話自保,能力達到神級地步。
  • 成日要同事為佢效勞,自己就蛇咗去high tea或放工閃人。

面對呢類冇「樽鹽」嘅同事,千祈唔好俾佢抽你水。佢面皮厚,你比佢更厚;佢領功時,你同上司講明係成Team人嘅功勞;飯局後你當眾直接問佢夾錢;公事上白紙黑字同佢溝通;佢當你係「私人助理」,你講明呢啲唔係你嘅職責範疇。勇敢say no,等佢冇法子攞著數。

面皮紙咁薄—溝通要客客氣氣

咪以為面皮紙咁薄嘅族群好易相處,皆因佢哋係極度小心眼,個性陰沉不定,好難估到佢諗緊乜。以下為面皮薄嘅經典特徵:

  • 絕對「唔話得」,小小批評都會搞到佢悶悶不樂,甚至當場失聲痛哭。
  • 向佢提出小小建議,佢確定你必然唔妥佢。
  • 對佢好啲,佢又覺得你另有企圖。
  • 開會永遠沉默,皆因佢認為自己嘅Idea唔夠好,妄自菲薄到神級地步。

面對面皮好似雞蛋殼一掂就散嘅異類,溝通時要小心翼翼,特別當你就佢嘅工作俾意見時,要採取委婉方法,例如話:不如你試吓咁做會唔會好啲?我試過咁做,效果唔錯架。開會時可多啲引導佢發言,先問其他人嘅意見,再問佢有咩睇法,或者投其所好問一些佢熱衷嘅題目,適時俾多啲鼓勵,等佢哋有番啲安全感,自然會融入團體氛圍。 

人或事總有兩面,無論面皮厚或薄嘅人都有佢哋嘅優點—前者敢於發言俾意見;後者處事低調唔認叻;只要多欣賞佢哋嘅長處,相處時自然更和諧融洽。