我做Marketing:事業中的三個黃金十年

我做Marketing:事業中的三個黃金十年

一生工作四十多年,每個階段都有一個重要嘅角色。呢四十年你會諗轉行、諗轉工,你會辭職、會被辭職,你會underpaid、會更underpaid。如果我哋以十年作為一個階段,對比起頭三個十年,第四個十年較為冇咁重要,因為當你步入55-65歲時,好多事情已經好難再去改變,所以作為一個打工仔,我哋一定要把握頭三個黃金十年。

 

第一個十年

第一個事業嘅黃金十年——25歲到35歲,呢十年決定你35歲之後嘅大方向,做邊個行業,做generalistspecialist,做管理層定被管理層,要唔要死做爛做日日OT等等。

呢段時間要多嘗試,找新方向,唔好怕行錯路由頭嚟過,只怕自己不停磨爛蓆令呢幾年枉過。呢十年你唔一定要好叻,但一定要有熱情,以學習為先,人脈為後。

另一方面,永遠都要將自己嘅定位比現況定高一級,職位就算係junior executive,但心態就要定自己為senior,為下一個階段作準備嘅同時,亦要挑戰自己嘅極限,因為只要知道自己嘅極限,就能夠知道往後十年你可以做到啲乜。

 

第二個十年

踏入第二個十年——35歲到45歲,開始發現自己已經冇可能再keep住日日OT,就算心理接受到,身體亦未必承受得起,如果仲未中六合彩的話,上管理層先係出路。

香港嘅管理層分「要OT」同「唔使OT」兩種,如果你仲係「OT經理」,或者仲未成為管理層的話,就要加快步伐。但如果已經係「唔使OT經理」,咁恭喜你,可以開始下一步,有工作能力後,就要開始建立人事能力。正常情況下,35歲都應該已經有少少人脈,所以之後做嘅事,就係「維繫」同「重整」。另一方面,除咗要做自己擅長同喜歡嘅工作之外,仲要有一樣工作以外嘅強項,為下一個十年作準備。

 

第三個十年

最後一個黃金十年——45歲到55歲。有人話過,45歲嘅時候,唔計擁有嘅物業,儲蓄最少要有一、二百萬先叫正常,當然呢個好難一概而論,不過有儲蓄一定好過冇。

但其實到咗呢個階段,你除咗擁有儲蓄、工作同家庭之外,仲要有自己嘅生意。人各有志,未必人人都想做生意,但如果能夠喺45歲時準備多一門長遠而具賺錢能力嘅生意的話,55歲後嘅生活,就唔使經常因為怕失去咗份工作而憂心。講到生意,唔一定係要搞到好大,重點係要有穩定或者可預計嘅收入,可以係股票投資收息,亦可以係開一間小店等等。

而最後亦最重要嘅一件事,就係要懂得看「價值」,能夠看到一件事或物有冇價值,就代表你已經學會取捨,取捨唔同嘅工作、層面、朋友、同事,留下健康、家庭、自由,令工作嘅最後十年更安心。

 

後生,你同人鬥;中年,你同天鬥;老年,你同自己鬥。要逃離呢個困境,就要為每個階段定下目標,亦為下個階段做好準備。

 

我做Marketing

 

由Michael及Derek兩位marketer創立的「媽劇停」平台。撰寫市場及職場文章。經常與不同機構及院校合作舉辦marketing及職場講座。著有《我做媽劇停》及《暖男之道》兩書。

 

檢視此作者的所有文章

 

延讀閱讀:

我做Marketing:職場見到都眼冤嘅同事

我做Marketing:做Marketing就一定要OT?

會計仔:邊個夠我嚟?OT篇

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Marketing / Public Relations職位