我做Marketing:職場見到都眼冤嘅同事

我做Marketing:職場見到都眼冤嘅同事

當你工作咗一段比較長嘅時間,就會發現工作其實好簡單,同事先係最複雜嘅動物。呢種動物分兩種,大部份都係蠢,小部份係叻,而比你叻嘅同事正常唔會騷你,但比你蠢嘅就成日搞你。而蠢人搞你,多數係「被動式」,搞咗你佢自己都未必知,但有啲半蠢半醒嘅同事,佢哋就會全方位主動加被動咁搞你,先令你最眼冤。


「一知半解的人」

無知,喺職場上其實冇乜問題,一知半解先係最危險、最具殺傷力。記得好耐以前請過一位新同事Ken,佢擁有Double degree,畢業前亦做過好幾份工作,叫做有少少經驗。Ken第一日返工,我交咗一份約5頁紙嘅文件畀佢,同佢講:「Ken,你幫我去嗰邊影10份,10分鐘後開會用」。20分鐘過去仍未見Ken回來,赫然發現佢並唔係用緊影印機影印文件,而係用手機嘅相機功能「影」文件…… 除此之外,佢仲「影」咗好多Reference畀我,希望開會有用……可能大家覺得有啲誇張,但其實係真人真事。

所以話,唔知自己力有不逮,但係又Aggressive嘅同事,其實係最難搞。佢哋「好醒目」咁幫你做好多事情,有做多、冇做少,工作態度一流,但只可惜全部都做錯哂。最令人反眼嘅係,有時你鬧佢又鬧唔落,你話佢,佢亦唔覺得自己有問題,最後幫佢執手尾仲慘過自己由頭做過。


「最涼薄嘅老屎忽」

老屎忽呢個詞語好似較為負面,但其實佢哋都有分好人同壞人,不過兩者只係一線之差,而呢啲老屎忽通常都係站於呢條線偏壞嘅一方,所以先被列入最難搞嘅員工之一。

記得有次因為一個較麻煩嘅Project,令全組同事OT咗無數個晚上,冇11、12點基本上唔使旨意放工。一晚約6點半時分,正當大家諗緊叫外賣還是落街食「快飯」之際,一位老屎忽放工經過,講咗一句「大家努力OT啦,之後儲錢買個靚棺材」。呢句「肺腑之言」,令到在座每位同事都想即刻送一個棺材畀佢,但因為該名老屎忽尚算高級,大家只好啞忍。後來有同事辭職,Last day嗰日同事送咗個棺材型嘅玩具散紙盒畀佢,笑笑口講:「我終於儲夠錢買畀你啦,慢用!」眾人大笑後就散去,而老屎忽之後幾個月都冇再同大家講野,真係唔見棺材唔流眼淚。


「負能量工廠」

不同同事抗壓嘅程度都唔同,有啲同事性格會較為負面,處理問題時都會傾向鑽牛角尖。佢哋除咗會因工作而令自己唔開心之餘,亦好鍾意「拖埋其他同事落水」,四處散播負能量種子。

最初佢哋只會因為工作上嘅難題而生怨,後期小小事都會呻一大輪,工作一小時,就有10分鐘怨天怨地,如果要佢OT,坐旁邊嘅同事就有排受罪。就算公司推出正面嘅Policy都好,都會被佢變成負面新聞。亦因為咁,大家好怕畀嘢佢做,因為佢哋每次幫你做完一個Task,放出嘅負能量都會令你減壽十年。


人嘅性格好難改變,對住呢啲同事,所有人都束手無策,老細又唔可以因爲咁而炒佢,同事投訴亦無補於事,所以只好要求自己調位遠離佢,或者安排一個愛理不理嘅老屎忽坐佢旁邊,可能有意想不到嘅效果。

無論你去邊間公司打工,工作永遠都係一樣,只有同事係唔同。同事更眼冤都好,其實唔重要,因為人工包埋,亦係職場練習嘅一部份,而重點係,千萬唔好成為別人眼冤嘅一份子,就已經好足夠。

 

我做Marketing

 

由Michael及Derek兩位marketer創立的「媽劇停」平台。撰寫市場及職場文章。經常與不同機構及院校合作舉辦marketing及職場講座。著有《我做媽劇停》及《暖男之道》兩書。

 

檢視此作者的所有文章

 

延讀閱讀:

我做Marketing:做Marketing就一定要OT?

會計仔:邊個夠我嚟?OT篇

打工仔連環不幸事件──見工中伏篇

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Marketing / Public Relations職位