我做Marketing:職場交叉點:同事犯錯,你會唔會出聲?

我做Marketing:職場交叉點:同事犯錯,你會唔會出聲?

面對做事求其嘅人,如果你而家唔指出佢嘅過錯,將來受罪嘅,可能係你。

無錯,係你。

面對人哋嘅過失視而不見,其實亦算犯錯,正如有啲法例,你知情不報亦算犯法。

明知人哋有做錯,點解有人會選擇唔出聲? 

▪每個新仔都犯過自以為會毀滅世界嘅錯誤

「我怕佢覺得我多事嘛,始終事不關己。」

好多時怕羞、怕麻煩、怕犯眾憎、怕畀人話扮晒嘢都會令人唔敢出聲。尤其喺香港,無論舊時返學定而家返工,好多人都唔習慣公開討論問題或者發表意見。取而代之,佢哋會竊竊私語、細細聲問隔離位,或者將問題擺喺心入面。最好例子就係每逢一個 meeting 尾聲,老細問「大家有無問題或者意見」,會議室就會仿如身處外太空咁寂靜,一眾同事各自迴避大家嘅眼神,直至老細話「Ok,散會」大家先鬆一口氣。

大家心目中嘅「怕」不外乎「怕大家唔認同自己」、「怕講錯嘢樣衰」。但請記得,每一次你發表意見,你都正為自己建立一個有思考嘅形象,而出聲更代表你 care 呢份工作。如果你發現其他同事做錯,你可以嘗試用反問或疑問句了解情況,以減少尷尬。

「我覺得佢之後應該會做返啱,我估。」

呢個想法其實有啲自欺欺人,亦係逃避處理問題嘅藉口。錯誤唔係發生喺自己身上,自然無咁上心,責任亦彷彿無咁大。但當事情發酵,過失敗露時,喺老細眼中,你同做錯嘢嘅同事其實無咩分別。一個團隊裡面無人能夠及早發現並指出問題,亦代表組員能力相約。同事做錯嘢但你唔出聲,最終有鑊齊齊孭。

▪日日上演塞車、湊老細、開OT,打工仔:「每隔兩秒我都想轉工﹗」

「咁我以為佢老細睇到實會出聲㗎啦。」

 下屬犯錯,上司好應該第一個行出嚟指正。但如果作為同事亦能夠挺身提點,對建立團隊關係亦有莫大幫助。

一個員工有感染力,其實比一個能幹嘅員工更為珍貴。具感染力嘅同事唔單止可以貢獻自己,亦可以幫助釋放其他同事嘅能力。人在職場,大部分人都只顧自己埋頭苦幹,關注自己有無做錯。但如果你可以做好自己工作之餘,亦有能力提點同事,到時唔止同事鍾意你,老細亦會更倚賴你。

 好多時「我怕」、「我覺得」同「我以為」都係工作出錯嘅源頭。當下次大家再想講呢幾句說話時,請停一停、諗一諗,不妨做多啲啲、謹慎多啲啲,出錯後嘅善後工作亦應該會少啲啲。

我做Marketing

 

由Michael及Derek兩位marketer創立的「媽劇停」平台。撰寫市場及職場文章。經常與不同機構及院校合作舉辦marketing及職場講座。著有《我做媽劇停》及《暖男之道》兩書。

 

檢視此作者的所有文章


延讀閱讀:

【香港消防處KOL】任何仁的幕後推手﹗政府媒體主任呃like觸民意

我做Marketing:事業中的三個黃金十年

職場常見的10句「語言炸彈」

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Marketing / Public Relations職位