打工求Title:Happiness Engineer、Chief Funster、G.O.是甚麼?有趣職銜的吸引力法則

打工求Title-Magician-Ninja-G.O.是甚麼?有趣職銜的吸引力法則打工一為求利(薪金),二為求名(職銜),前者愈高愈好,後者除了愈勁愈好,近年且有愈fun愈吸引的趨勢。吸引邊類人士?就係新世代打工仔。

大前提:Y至Z世代,自細衣食無憂,做慣腦友記與網中人,多創意愛分享,投身社會大學,錢固然重要,但更重要的是,份工有得發揮,千祈唔好悶。先從職銜入手,傳統字眼如senior、associate、deputy、manager到director……夠威猛,激活人心,不過未夠juicy。

法則1:新瓶舊酒,職銜魅力升級

若然換上magician、ninja、alchemist、wrangler等sexy words,成件事唔同晒,孭住呢啲title返工,人都醒神啲。經典例子有Club Med度假村,為住客服務的員工,天才地叫G.O.有趣職銜(Gentle Organizer);迪士尼樂園的演藝人員係Cast Member。以為只有旅遊款待業最緊要好玩?美國密歇根州Make-A-Wish Foundation前主席,受迪士尼啟發,將自己的職銜改為Fairy Godmother。Google的People Operations是做人力資源的。近如香港,兩年前豬肉業界便將「豬肉佬」俗稱,升呢為「肉類分割技術員」,當時係威係勢,連年輕女子都受吸引入行。

▪正在搵工的你為寫CV發愁?大量CV sample供參考﹗

▪大量筍工空缺,立即入嚟!

法則2:換湯都要換藥,工作性質多元化

「肉類分割技術員」因切肉的辛苦勞動性質不變,故入了行的有志之士都紛紛劈炮唔撈。可見將職銜加fun,雖可激勵員工,提升滿足感,同時也要拉闊工作範疇,做到多元化,才可以留住怕重複的新人類打工仔。例如美國一份Customer Service Ninja的工,點止死咕咕回應顧客咁簡單,要由頭到尾跟足order、回答查詢、幫顧客及業務夥伴解決困難,全程做到九成helpful,直情變身忍者,無改錯名。職銜有型,職責又多姿多采,同人分享時可以呃多啲like。

▪【冇淡季】世界冠軍級扭氣球師 節日平日都爆show 時薪千元 日走六場

▪【普通話工作】兼職導師、前線銷售易賺錢,口語傳譯員時薪逼近千元大關

法則3:新瓶新酒,創意職銜最迷人

幾乎10年前,澳洲昆士蘭旅遊局招聘名稱平平無奇的「大堡礁保育員」,已經世界矚目。5年前,澳洲旅遊局將職銜包裝為Chief Funster「玩樂達人」等6份絕世筍工,簡直瘋魔全球。如今,5G殺到,AI、Blockchain、Big Data盛行,更多講求創意的新工種冒起,職銜都反斗過人,比旅遊局更冇框框。請人做Data Guru,係掌管企業研發部的數據及AI活動;Data Storyteller負責製作富娛樂性的網上短片,與大眾分享如何透過影像用數據改變世界;Happiness Engineer做乜?用即時對話、論壇及單對單屏幕共享等方法,全天候支援該公司的全球團隊。至於Rockstar Copywriter,則為CEO做文書寫手,兼創作社交媒體帖文,宣揚公司業務及市場景況,出到搖滾巨星的字眼,志在招攬高手加盟。

▪防伏措施:由apply去到見工 360度睇呢啲辨別伏工

▪【最下流職業】古代九流工種穿越到現代,化身邊一行?

備忘錄:天馬行空職銜,有好有壞

凡事兩面睇。交換卡片時,滿fun職銜換來的可以是艷羡目光,也可以是令人一頭霧水的疑惑眼神。Subway的Sandwich Artist尚一望而知;你估到Director of Chaos的工作範疇嗎?原來是股神巴菲特旗下公司Berkshire Hathaway,肩負組織年度投資者大會的職位。創意過火的,予人幼稚感覺,影響專業形象,亦難令外人理解,更難以用作搜尋新工的keyword。回看本地企業,大多是老老實實,沿用老正職銜,輔以福利花臣吸引人才,未至玩到咁盡。

撰文:Yvonne Yeung 圖片:Getty Images

延讀閱讀:

擇日遞信:揀定2019年辭職黃金期 縮短實際工作日

你的同齡人,正在無聲無息地拋離你

應該轉工嗎?一份適合自己的工作應有的8個條件