[扮工心經]醒目打工仔,忙碌中偷點時間回氣

香港打工仔出名工時長,無論邊一行都會有段Peak season忙到甩轆,但亦都總會有完咗大Project回回氣嘅時間。而呢一段短暫而幸福嘅悠閒時光,一旦被老闆發現,就會立即結束。所以呢一篇文唔係想教大家返工唔做嘢,而係做完手頭上嘅嘢而又未有新工作時,不妨應用以下嘅「扮工心經」,一方面顯示自己存在價值,一方面將悠閒時光稍稍延長。


初階:扮工心經之入門四式

第一式:辦公室快走功

[扮工心經]醒目打工仔,忙碌中偷點時間回氣

各位新入門嘅扮工派師兄弟姊妹,當然要先練好基本功!所謂「辦公室快走功」,就係要運用大家嘅大腿同腰部運功,臀部要快而有力地離開座椅,果斷地拎起水杯、文件同筆,以忙碌嘅步速行去Pantry方向,神色要凝重認真,唔可以有一絲嘅猶疑。中途路經相熟同事座位,就可以放低文件,討論少少公事,再一齊快步行去Pantry,扮有嘢要係Pantry傾。搞掂!

發功秘訣:此招旨在視覺上製造存在感,不能太常使出,否則會被上司發現。


第二式:無敵音波功

[扮工心經]醒目打工仔,忙碌中偷點時間回氣

當各師兄弟姐妹打好基本步法,就可以修練扮工派第二式「無敵音波功」喇!呢一招首先要舒展上肢筋骨,拎起電話,用強而有力嘅指尖打電話畀同事、合作商、客人等等同工作有關嘅人。接通電話之後,就氣聚丹田,再用嘴部肌肉發功,用上司剛好可以聽到而又唔刺耳嘅聲音,同對方跟進最新嘅工作進度,即使明知無最新進度,都要發功,等上司知道你有做嘢!

發功秘訣:此招旨在聽覺上製造存在感,需要運氣確保音量適中,太嘈吵可能會令同事反感。


第三式:舞筆弄紙法

[扮工心經]醒目打工仔,忙碌中偷點時間回氣

呢一招非常講求定力,坐係位上面要保持挺胸收腹,控制好臉部神經,流露認真而自若嘅神態。此時打工仔只需開個Word、Excel、PPT File,做任何你需要做嘅私人嘢,最適合嘅就係計劃旅遊行程、計算所需旅費等等,只要你指尖有勁,發出敲打鍵盤嘅清脆聲音,上司就會覺得你係做緊嘢!另外,打開E-mail,亦可以瘋狂同同事傾計(不過要小心IT同事track到啦)。總之,所有嘢都變成文件形式去做就得,有同事成日返工就係喺度做Freelance寫稿,高手!

發功秘訣:此招最重要就係要神態自若!就算上司行近,都唔好心慌慌收埋個File!


第四式:辦公桌迷紙陣

[扮工心經]醒目打工仔,忙碌中偷點時間回氣

顧名思義,「辦公桌迷紙陣」講到明係陣式,正如風水陣一樣,最重要係擺個陣勢出嚟!一個員工嘅檯面如果乜都無,整齊乾淨,會令上司覺得「你一定係無嘢做,先咁得閒執檯啦」。所以辦公桌必須要擺出:「我很忙」嘅陣式,File同印滿PPT嘅紙要亂中有序咁放滿檯面,迷惑上司。就算你去咗Pantry同同事玩食雞,上司行過你個位,都會覺得你好忙,唔使運功都掂!

發功秘訣:個陣唔好擺一世,每日都要換一換唔同色嘅File,代表你每日都跟緊唔同嘢!


高階:扮工心經之高手三式

當各位扮工派師兄弟姐妹已經練成以上入門四式,就可以修煉高手三式啦!入門四式,係鬥力。高手三式,係鬥智。


第一式:天羅地網大問法

呢招「天羅地網大問法」就係最需要用腦嘅!先用少少時間,整理好曾經跟過、跟緊、即將會跟嘅工作,記住重點,再諗定幾條問題問上司。佢一出現,就不經意咁問一兩條,營造出你好緊張工作,好上心嘅感覺。你咁自動自覺,上司自然唔使管你啦!記住,愈聰明嘅人愈識用懶方法做完工作。同一道理,用少少腦扮工就可以延長輕鬆時光,幾抵!

發功秘訣:上司問你嘢之前你先問佢問題,主動出擊,攻其不備!


第二式:千手千眼法

[扮工心經]醒目打工仔,忙碌中偷點時間回氣

師兄弟姐妹,用呢一招,要眼睛非常精靈,有乜風吹草動都要立即反應過來,例如:開門聲、腳步聲、人聲等等,總之有任何跡象顯示上司會出現,就要即刻開始Chok個勤力樣出嚟!平日亦最好同同事建立良好關係,將佢收為哨兵,等佢通風報信,以策萬全!

發功秘訣:人人天資不一,如果你自問反應慢,千萬唔好使呢招!


第三式:萬Mon如來掌

[扮工心經]醒目打工仔,忙碌中偷點時間回氣

要成為扮工高手,必須要善用大Mon同細Mon!電腦就係大Mon,電話就係細Mon,雙劍合壁所向無敵!當你需要Plan旅遊行程、睇股票、進修課程做功課,就可以充分利用兩個Mon,電腦可以做記錄、打文字、計算等等文書嘢,電話就可以睇你需要嘅資訊,有幾多部電話就碌幾多部!

練功秘訣:望大Mon嘅時間同望細Mon嘅時間,係8比2,千祈唔好成日望細Mon,否則前功盡廢!


扮工派師訓:各位師兄弟姐妹返工辛苦,大家心照!不過認真工作,做到嘢,上司欣賞,升職加薪,更加重要。所以取中庸之道,扮還扮,做得好正經事又唔會畀人捉到,就大家都Happy啦!

 

延讀閱讀:

為甚麼一份工作不應做超過四年

不能在面試時說出口的「離職理由」

今日係我嘅Last day(2):一星期返七日Analyst Programmer篇

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案