放大假ing,點樣令腦袋清空公事?

Holiday

根據Randstad第二季度Workmonitor調查結果顯示,每十個有八個香港僱員受壓,放假仲要回應公司電話和電郵。近呢幾年,唔少老闆慣性放工後whatsapp僱員,令打工仔倍感困擾。當收到同事來電或訊息,冇辦法拒絕回應,又唔可以扮收唔到。想放假放得安心啲,點做先可享受私人時間,又可巧妙應付同事提問?

設定回應時間

難得放長假到外地散心,唔想受公司訊息干擾,放假前預先向所有同事發一封電郵,說明在放假期間不方便通話,並告知在某段時間,例如晚間九點至十點會檢查並回覆電郵,那麼你便可免卻日間因冇開電話而心情忐忑不安,也可以在放假期間回應同事提問。

坦誠說出私人行程

假如放工後或周末期間,老闆慣性whatsapp或call爆機,假日24小時on call認真冇晒mood﹗你大可放假前坦誠話俾佢哋知周末嘅私人行程,例如上興趣班減壓或上進修課程,或到圖書館參閱與工作相關書籍等,呢類場地通常不准通話,或不能隨時接收來電訊息,只要你肯開心見誠溝通,老闆一般都會體諒。

申請公司專用電話號碼

如果你嘅工作性質需要接觸好多客戶,或聯絡唔少合作夥伴,不妨向公司申請或自行申請公司專用電話號碼,當你放假時,自行將公司手機關掉(或將公司sim card換成私人sim card),當然,你可以選擇在假日日間時間關機,或在特定時間開機檢查公司來電訊息,客戶或合作夥伴了解你假日會關機或有限度回覆來電,自然會習慣你設定嘅溝通模式。

周末或長假前交代工作進度

上司喺你放工後或放假時call爆你機,無非都係有嘢唔清楚,或未能全盤了解。每逢周五或長假前,不妨跟上司詳盡交代你手頭上每項工作嘅進度,如果佢哋忙到冇時間俾你,你要選擇性講重點,例如項目跟進時有咩階段已達成,或遇到乜嘢問題,有咩具體建議或解決方案都要事先諗定。上司知你有交帶,對每項工作都跟進得咁細心,佢哋自然放心,你放假又放得安心﹗

無論老闆或打工仔,都想盡情享受專屬自己嘅私人時間,只要放假前做足以上準備,就唔駛成日囉囉攣,搞到冇晒holiday mood啦﹗