放膽起用!八、九十後未必是Troublemaker

九十後近幾年,打開報章雜誌或瀏覽網上媒體,一大堆形容八、九十後青少年的都是負面標籤——自以為是、冇sense禮貌、過於依賴、抗壓力弱又EQ低、空談理想不求實際、要錢又要work-life balance……雖然負面評價一籮籮,但佢哋喺招聘市場上依然係有一定的存在價值,市場在變世界在轉,嘗試換一換角度,欣賞一下他們的優點,大膽迎接這班職場新力軍。

破格創意諗頭

離開學堂一兩年的新鮮人,雖然累積的社會經驗唔多,但亦勝在冇咁多無形框框封鎖佢地嘅思維,或許他們的構想並不是次次可行,又過於天馬行空,但上司可以在他們的古怪點子上循循善誘,再加以經驗,說不定可以把不可能變成可能。如舊人可放下家長式的教導姿態,兩者撞擊下或會擦出新火花,為公司帶嚟更多突破性的新發展。

衰咗唔怕再嚟過

唔少喺職場打滾多年嘅老鬼打工仔,日日埋頭苦幹做例行公事,奉行多做多錯、少做少錯、唔做唔錯嘅金科玉律。對於改革、轉型等項目,新鮮人反而大膽得多,你可以話佢地冇大冇細,唔知亦唔care「死」字點寫,但佢哋就係冇心理包袱,又樂意試新嘢,如果老闆俾佢哋多啲機會參與新項目,佢哋多數會抱著豁出去的心態放膽一搏,好彩的話會為公司帶來得益,就算衰咗,只要俾多啲鼓勵,佢哋意識到自己身負重任,亦甘願不斷嘗試。

緊貼潮流,勝任社交網站或數碼媒體要職

企業社交網站如Facebook、微博、Twitter、Youtube等已成大勢,但是很多老鬼以傳統宣傳策略於社交網站硬銷其實很難獲得年青人垂青兼且被唾罵而不自知。相反如能大膽起用年青人擔任社交網站創作,以他們新興詞彙及大無畏 精神與社群溝通,對於捉緊市場脈搏及增加fans凝聚力更事半功倍,這方面老手反而要多多向他們偷師學習呢﹗

管理新鮮人,其實是雙贏關係

每年有不少畢業生加入各機構的實習生計劃,表面看來是對畢業生有利,但對於中層管理人來說,透過訓練新人,特別是那些毫無工作經驗的新鮮人,要由零開始指導他們工作上的細節,或監督進度,雖然過程當中或會遇上很多阻滯,或令人想死,但最終都能夠訓練或測試自己的管理和組織能力,就算遇著態度有問題的新人,就當成係訓練你EQ和忍耐力的最佳時機,當見識一下新奇事物,擴闊眼界,為日後晉升到更高的管理階級而鋪路,絕對唔係壞事。

其實每樣事物都有正反兩面,每個年代的青少年都各具特色和個性,不要全盤否定他們,給予新鮮人一個機會,自己又多一個成長機會,無論僱主、上司也會不斷獲得進步。而新鮮人想要贏得別人尊重,一些待人接物的基本禮貌及態度亦要堅守,Whatsapp辭工就絕對要不得了。