旅遊達人唔易做 最難忘過境被軍警用槍指

好多人一聽到「旅遊達人」呢個職業,可能馬上就會聯想到:「返工就係去玩,唔使做就有錢收,最識嘆係你啦。」其實,世上係冇不勞而獲嘅事,喺風光嘅表面背後,佢哋為咗賺取足夠嘅收入去實踐四處遊歷嘅目標,可能要付上比平常人更多嘅毅力同堅持!

你又有冇心思思想將旅遊變成職業?jobsDB今次專訪「Amazing Journey 2018」比賽兩位旅遊達人評判──由大埔踩單車去南非嘅阿翔,同埋旅遊、電影雙料Blogger「有故事的旅人」Jacky,分享佢哋從事呢份另類工作嘅點點滴滴。

旅遊達人唔易做 最難忘過邊境畀軍警用槍指

Jacky(左一)及阿翔(左二)頒獎予優勝隊伍


jobsDB:你哋之前係做咩工作?係乜嘢原因驅使你哋轉做旅遊Blogger?

阿翔:我之前係喺主題樂園度做Event management㗎!因為我本身都好鍾意旅遊,所以我一直都有寫開旅遊Blog。後來我辭咗職去Working holiday,又有接吓旅遊書嘅Freelance寫書工作,但Freelance始終唔足夠維持生計。之後我決定用年半時間由大埔出發,踩單車去南非;返嚟香港之後,多咗好多同旅行社、觀光局合作嘅機會,所以就正式開始咗全職旅遊人嘅生活啦!

Jacky:我本身係讀酒店,畢業之後去咗做商場管理。其實我一開始係寫開電影Blog先嘅,後來辭職去咗Working holiday,撻著咗自己條「旅行癮」,就開始寫埋旅遊Blog啦。返嚟香港之後,我去咗全職做旅遊書嘅編輯,工作上接觸到好多觀光局、旅遊相關行業、酒店等等,就開始發現自己可以點樣將旅遊變成職業。


jobsDB:你哋去過咁多地方,不如講吓令你哋最深刻嘅一次經歷吖!

阿翔:最深刻嘅一次係我踩單車去南非嗰陣,去到途中啲中亞國家,咁啱遇上落大雨,唯有第一次硬住頭皮咁去一個當地人嘅屋企敲門借宿。雖然大家語言上溝通唔到,但大家透過微笑同身體語言,都會知道大家想表達啲乜。佢哋好好客、好歡迎我,亦畀我了解到佢哋嘅風土人情,係一次好開心嘅經歷。之後嘅旅程我都有繼續搵當地人借宿!

Jacky:至於我就係遊巴爾幹半島嘅一次經歷。一般香港人入去塞爾維亞係搭飛機同埋免簽證,而我當時就經陸路搭巴士由馬其頓入去塞爾維亞,點知去到塞爾維亞邊境,啲關員一見到我本香港護照寫住「China」就唔畀我入,無論點解釋都唔聽。嗰時三更半夜,架巴士又走咗,咁我唯有行高速公路行返去馬其頓,條路又黑,又有啲車喺度穿插,好鬼危險。點知一行到去邊境,啲軍警仲舉起支槍指住我,因為一般都係搭巴士過境,我行住路咁過去,差啲畀人當係非法入境者咁辦。最後搞咗一大輪先入得返去,仲要兜個大圈咁先去到個目的地……自此之後我每次要過邊境嘅時候都好驚,哈哈。


jobsDB:旅遊都要維持生計㗎喎,可唔可以分享吓做Blogger其實係點樣搵錢?

阿翔:當然單靠寫自己個Blog係搵唔到錢㗎啦!所以主要係為一啲旅遊平台、雜誌同報紙寫稿,同觀光局合作等等。好似我上年同台灣觀光局合作,佢哋贊助我踩單車環島,經費可以支持到我嘅旅費之餘仲有少少錢剩。另外亦有同旅行社合作,幫佢哋寫稿同拍旅行團宣傳片等等。

旅遊達人唔易做 最難忘過邊境畀軍警用槍指

Jacky:我都同阿翔差唔多,另外亦有接吓啲Freelance嘅編輯、Social media工作,同埋喺網上電台主持吓節目咁。其實搵到幾多錢係好睇你嘅Sponsor出手幾多,前排有個新開嘅旅遊平台搵我寫個比較少人寫嘅題材,一個月寫咗五、六篇稿,收入可以仲多過一份正職。不過始終唔係穩定工作,今個月有錢,下個月可能一個仙都冇!


jobsDB:聽落其實做旅遊Blogger都唔係一件輕鬆嘅工作喎!仲有咩其他辛苦之處呢?

阿翔:正因為收入唔穩定,所以一定唔可以等運到,要主動做個Project出嚟去搵人合作同傾贊助,傾咗又未必成功,傾成咗返嚟又要落手落腳做。好多人以為做Freelance好自由,好似寫幾隻字就會紅咁,但事實唔係咁,其實係好忙、好辛苦㗎!而且去嗰個旅行又未必係自己好享受,要不停咁拍片同寫稿。

Jacky:同埋做我哋呢行都好容易被人誤解。當我真心推介一樣嘢嘅時候,好多人會話:「你讚到佢咁好,一定係收咗錢啦!」但其實真係冇……同埋有時好彩影到一啲靚相,又會畀人話:「你為咗呃Like走去P圖P到咁,明明我去嗰陣冇咁靚!」初初我都好在意呢啲評語,後來都接受咗。


jobsDB:你哋覺得出嚟做咗旅遊Blogger之後,同以前返Office嘅自己相比,有咩唔同咗?

阿翔:以前我係一個比較被動同內向嘅人,而家我就主動咗好多,因為呢一行真係識人好過識字,人脈要夠廣先可以搵到足夠嘅客源。另外亦意識到唔好將自己睇得太高或者太低,要爭取人哋嘅認同,但亦唔可以強求超過自己應得嘅回報;畢竟最初我嘅目的只係想去旅行,而爭取認同只不過係支持我繼續去旅行嘅手段。

Jacky:以前返工就只係朝九晚六,做唔做都係收咁多錢,做唔掂啲同事、上司又會幫你頂。但而家就係自己盤生意,交唔切稿啲客就會甩。我試過一日要交九篇稿,真係要好自律,校定鬧鐘逼自己七點就要起身做,仲忙過返Full-time工。

旅遊達人唔易做 最難忘過邊境畀軍警用槍指


jobsDB:而家好似好多後生仔、同學仔都想做旅遊Blogger,你哋有咩建議可以畀佢哋呢?

阿翔:其實我絕對支持佢哋去做自己想做嘅事,喺打工以外搵一條自己嘅出路。但你一定要知道自己嘅定位係乜,當全世界嘅人都話想做KOL嘅時候,你點樣突出自己係與別不同,令人哋一講起某個主題就諗起你呢?

Jacky:坦白講,而家喺Facebook做KOL個市場已經有啲飽和,如果你想好快可以用個Page嚟搵錢,可能真係要好Aggressive、有啲好爆嘅內容先有機會。所以不妨先抱住分享嘅心態去經營個Page,而且最重要都係自己本身真係鍾意做呢件事先。


相信大家對旅遊Blogger呢個工作嘅認識都加深咗唔少啦!全靠呢班旅遊達人嘅用心分享,令我哋去旅行時可以從更多角度去了解一個國家嘅面貌。你又有冇興趣加入成為佢哋嘅一分子?

 

延伸閱讀:

用鼻子探索香港文化 傳統小店蘊藏豐富歷史

一次過解答Fresh Grad今年搵工嘅疑難

給職場新人:辭職常見問題集

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

想尋找你下一個機遇? 立即瀏覽jobsDB最新Tourism / Travel Agency職位