探討6個日資公司文化 — 你個日本老細有冇搞「忘年会」?

日資公司 文化

唔同國家嘅職場都有唔同嘅文化,而外資企業嚟到香港開公司,好多時都會帶埋呢啲文化過嚟。其中,日資公司都有唔少有趣嘅文化,無喺日資公司返過工嘅朋友可能完全無聽過。以下就分享幾個特別嘅日資公司職場文化,等大家入去做之前有定心理準備啦!

1.朝会(Asakai/Choukai) = 早會

喺日本嘅職場,除咗結果,過程亦非常受重視,所以佢哋習慣要成日互相報告進度。除咗正式開會之外,有啲日資公司每朝都會聚集埋一齊,用十至十五分鐘匯報吓大家做緊咩嘢、當日有咩行程、分享意見、報告業績咁,大家畀吓意見等互相有個照應。

2.ラジオ体操(Rajio taisou) = 電台體操

以前日本為咗提高國民健康而開始每朝喺電台播放「電台體操」,直到而家,部分小學或者公司(特別係有工廠嘅公司)都會喺上堂/開工之前一齊做呢個體操。佢有拉筋、跳動、深呼吸等簡單動作,因為需要嘅地方唔大,可以直接喺自己個位附近做。唔講唔知,香港都有日資公司仍然保留住呢個習慣㗎!不過對於每朝忙住喺公司一路食早餐一路做嘢嘅香港員工嚟講,可能就要少少時間適應。

3.社員手帳(Shain techou) = 員工手冊

呢本「社員手帳」同學校手冊非常相似,開頭都會寫吓公司歷史或理念咁,目的喺想員工對公司理念有更多認知,同埋更有歸屬感。

4.社章(Shasyou) = 公司襟章

細細粒嘅「社章」就同你中學時一定要扣嘅校章一樣,目的係可以令其他人喺著住西裝嘅云云眾生之中,知道你係邊間公司嘅人,亦順便提醒你去見客時係代表緊公司,要留意言行舉止。多數歷史悠久嘅大公司都會要求員工佩帶社章。

5.ほう・れん・そう(Hou-ren-sou) = 報告、聯絡、商量

呢幾個字來自日文嘅「報告(Houkoku)、連絡(Renraku)、相談(Soudan)」。因為日本嘅職場文化好著重過程,好多上司都要求下屬定時報告工作進度,保持彼此嘅聯絡,有咩事記住要有商有量,唔好咩都自己一個人決定,要同上司講一聲先。

6.忘年会(Bounenkai)・新年会(Shinnenkai) = Annual Dinner、開年飯

「忘年会」同香港人嘅Annual Dinner差唔多,都係年尾食。不過因為日本係過新曆新年,所以會喺12月份搞「忘年会」,而比較少搞Christmas Party。轉個頭到咗1月,又會再食開年飯,即係「新年会」啦。不過好多喺香港嘅日本人老闆都會入鄉隨俗,跟返農曆新年搞「忘年会」同「新年会」。順帶一提,雖然日本無派利是畀成年人嘅習慣,但好多喺香港嘅日本人老闆都會入鄉隨俗派利是㗎!

各位入咗去日資公司工作嘅朋友,你公司仲有冇保留呢啲文化?你嘅感覺又係點呢?不妨留言同大家分享吓!

本文由Kingsway Personnel提供

檢視此作者的所有文章

延伸閱讀:

日資公司大解構(1):企業文化篇

日資公司大解構(2):企業文化篇

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案