暑期工中伏實錄(1):「Internship」定係廉價勞工?

暑期工中伏實錄(1):「Internship」定係廉價勞工?

主角:嬌嬌女Hana,某大學BBA Year 3學生,被爸爸媽媽鍚到燶,從來無打過工
老闆:Billy,笑面虎,數口精,每年都會請大學生做「Internship」
同事:阿輝,Marketing小薯
地點:上環某商廈


Hana上年放暑假,日日喺屋企煲劇,好鬼無聊,於是佢朋友就力勸佢今年搵返份Intern,第時寫份CV都靚啲。Hana都覺得有道理,上網一搵就見到一份招聘廣告,寫住請「Sales and Marketing Assistant Internship」,需要有活力兼捱得嘅年輕人,一齊推廣新嘅網上平台咁話。Hana見間公司喺上環,工作時間都係正常九點到六點,返五日工,就申請咗啦。

見工當日,老闆Billy一見Hana嬌滴滴,笑容甜美,就立即簽約:「Hana,你實在太少工作經驗,不過見你咁有誠意,就請你啦。因為係Intern,我哋公司只能夠Offer你五千蚊一個月,由五月中返到八月中,OK?」Hana心諗:「唔緊要啦!錢都唔係最重要,學到嘢就得啦,如果有靚仔同事就仲好,哈哈。」簽完約,Billy就笑笑口送埋Hana去搭「車立」。

——

一考完試,Hana著住Daddy新買畀佢嘅名牌高踭鞋,準時九點正返工去。Billy安排佢坐喺Marketing同事阿輝隔離,話:「我哋而家開始緊一個新Project,你要負責管理Facebook、IG、微信公眾號、Twitter,客人有問題你要即刻回應,有咩唔明問阿輝,仲要支援其他同事,聽日跟佢哋去Sell客,你好重要㗎!畀心機做好啲!」

Hana好開心咁同隔離嘅阿輝講:「哇,阿輝你聽唔聽到呀,Billy咁睇得起我,我要努力做好啲先得!」阿輝托一托眼鏡,輕輕皺住眉話:「係嘅,不過你要有心理準備有排OT啦!」Hana嘟起嘴,無諗過呢位新同事反應咁冷淡,決定唔理佢,努力睇以前嘅Post學寫Feed!

——

之後嘅每一日,Hana都幾乎係公司最遲走嘅一個,一開始講明嘅朝九晚六變咗做朝九晚九,除咗管Social Media之外,個個同事都有嘢要佢幫手做,又要影印、又要派傳單,仲要叫埋外賣!原本諗住捱到出糧就食好啲,獎勵吓自己啦,不過,一個月過去,點解仲未出糧嘅?

「阿輝,你知唔知點解仲未出糧嘅?」Hana弱弱一問,阿輝終於忍唔住力數老闆:「你唔好睇Billy笑笑口,好似好好人咁,佢根本係請你做廉價勞工咋傻妹!你諗吓,你一個星期出去幾次幫手派傳單,啲車費係Claim返畀你定要你自己出?日日OT超長工時,星期六要你拍硬檔幫手返半日,合約有無寫話有得補返水?喂大佬,份工畀得幾多錢你呀!」

——

Hana聽完阿輝講,終於諗通晒,難怪一直覺得有啲嘢唔妥,又以為係自己唔捱得。第二朝,Hana一見到Billy就捉住佢入房傾,Billy又露出招牌微笑問:「點呀Hana妹,我見你工作表現好好,係咪做得唔開心呀?」Hana鼓起勇氣講:「我覺得呢度工時太長,希望辭職。」

Billy收起笑容,用凌厲嘅眼神望實Hana,房間溫度瞬間降低:「Hana,其實我畀呢個機會你嚟學習,係袋錢落你袋。如果你去意已決,我都唔留你,不過合約寫明Internship一共三個月,未完成係無得出糧嘅。仲有,上次你跌壞咗公司個平板電腦,要賠返畀公司,人情價收你一半,你都要畀一千。」

最後Hana實在唔希望做咗咁耐得個桔,就決定繼續捱埋落去,當買一個教訓,以後搵工真係要小心無良僱主!


NG事項

1. 不合理條文是但簽

僱傭合約中條文多多,但無論字句有幾多,有幾長,都要逐條睇清楚。如果發現有任何意思含糊,或者不明字眼,一定要即時提出疑問,千祈唔好因為怕麻煩,唔好意思而是但簽咗先!好似呢份合約咁,原來寫明三個月之後先出糧,就好明顯係不合理條文。一旦發生爭拗,人人都係睇份合約做嘢,而你當初又簽咗,咁就真係口同鼻拗。


2. Internship定廉價勞工?

Internship有名你叫工作實習,近年來好多學生都會經相關學院同學校申請唔同公司嘅實習學員計劃,或者係自己走去搵實習機會。要注意,有啲實習計劃係由提供課程嘅教育機構安排或認可,屬於該教育機構全日制經評審課程嘅必修或選修部分,參加嘅學生稱為「實習學員(Student intern)」。至於坊間搵嘅所謂「Internship」,份工做唔做得過,工作內容所得嘅經驗同薪酬係咪值得,要靠自己衡量,貨比三家。


3. 無限額賠錢大法

Billy以跌壞公司平板電腦為理由,叫Hana賠返人情價$1,000,呢個真係陷阱多過人情喇。其實呢,賠錢個限額就有勞工法例規定嘅!僱員因疏忽或失職而損壞或遺失僱主的貨品、設備或財產,每次只可按值扣除,但以不超過$300爲限,詳情可以參閱勞工處《僱傭條例》。呢個$1,000真係絕對搵笨,千祈唔好畀佢呃。


Internship係正式投入社會前嘅預習,無咗父母、師長嘅庇蔭,大家作決定之前一定要從多方面平衡、考量,學識點樣保障自己!

 

延伸閱讀:

一次過解答Fresh Grad今年搵工嘅疑難

畢業生唔好揀錯第一份工

調查:僱主收到畢業生CV會睇啲乜?

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案