暑期工中伏實錄(3):想成功,首先要變靚啲!

暑期工中伏實錄(3):想成功,首先要變靚啲!

主角:Peggy,應屆DSE畢業生,貪靚少女,性格單純,緊貼美容瘦身資訊
上司:Maggie,銷售經理,身光頸靚,名牌圍繞;看似照顧下屬,為人著想
老闆:Paul,美容公司Sales Team老總之一,擅長取信於人
地點:旺角寫字樓/尖沙咀街頭


Peggy考DSE期間,額頭生咗大量暗瘡,細細粒紅卜卜,聽朋友個朋友話有間相熟嘅美容院正在招聘推廣員,就想去見工,諗住搵啲零用錢之餘,又可以學到啲實用嘅美容資訊。

因為係朋友嘅朋友介紹,Peggy對呢間美容院無一絲懷疑,滿心期待咁去見工。面試嘅人係Sales Team嘅老總Paul,佢嘅開場白係:「你好似我侄女,佢出年先考DSE!」Peggy感到大家嘅距離瞬間拉近。跟住嘅對答都係常規面試題目,講明:每週工作五日,輪班工作,喺室內地方向客戶推廣公司美容產品,詳情視乎組長安排,薪金每日$500。兩人傾得投契,即場簽約,Peggy當然無仔細睇條款!

「公事傾完,我當你係世侄女先教你嘢。你額頭啲暗瘡要搞搞佢,唔係入到U就好大鑊。公司有幾款Facial都好啱暗瘡,你得閒問吓美容師,可以問長工借用優惠價。」簡單幾句已經勾起Peggy嘅愛美之心。

——

第一日返工,Peggy被安排跟銷售經理Maggie。Maggie帶佢行一轉公司,認真介紹清楚每部新機,每件Product……Peggy心諗:「公司竟然唔收錢幫一個短期員工培訓,一定唔會係騙案。」

第二日返工,Maggie帶Peggy去尖沙咀街頭遊說路人做問卷、填資料,收集「都市人嘅美容瘦身習慣數據」。雖然工作內容同面試所講完全唔同,但Peggy唔覺得為難,仲欣然接受。全日Maggie不斷同Peggy傾美容瘦身經,話:「我以前都係成頭暗瘡㗎,好彩返咗呢份工,做完除暗瘡Facial兩次,真係好返好多,之後再做埋成個療程,就好返晒。」收工後,Peggy滿腦子都係:除暗瘡Facial。

第三日返工,工作依舊,Maggie看似不經意咁問咗句:「你想唔想試做除暗瘡Facial?我可以借個Quota畀你,長工每個月有兩個Quota可以免費做Facial。」Peggy諗都唔諗就接受,仲千恩萬謝,以為自己執到寶。

療程過後,Maggie大讚Peggy面色大有改善,暗瘡收淡晒,聽到人心花怒放。Maggie於是繼續遊說:「咁有效,你不如做晒成個療程。我借個員工優惠畀你啦,每個月得三次機會咋。見係你先借咋!我都想你變靚啲,幫我跑多啲數。呢個世界睇樣睇身材㗎嘛,少一樣都搵唔到錢。」一字一句莫名其妙咁打入腦海(即係洗腦),Peggy正式走入陷阱,以員工6折優惠購買咗原價$2,800嘅療程。她腦中嘅小魔鬼不斷同佢講:不過係$1,680,差唔多三日嘅人工,自己賺錢自己洗,好值得呢!

——

時光飛逝,工作咗半個月之後,公司出現新制度。Maggie話:「公司要求所有Sales Team嘅員工都要追數,包括你哋短期員工,每日要交300份個人資料,差一份就扣一蚊。但唔怕啦!你之前都交到數。」第一日,Peggy出盡九牛二虎之力,總算跑夠數;第二日,差10份;第三日,差50份。

「點解呢?你明明之前都夠數。我知啦,因為你呢個星期肥咗好多,無咁靚,少咗男仔幫你填資料。唉……」莫名其妙咁,Peggy被遊說購買咗幾個減肥療程,6折再加員工周年優惠8折,總數$18,800;因為有周年優惠,又順便買多兩個暗瘡療程,只需$2,688。而且呢,可以直接喺人工當中扣除,只需簽約而毋須即時支付。

直到出糧嗰日,Peggy滿心歡喜以為自己會收到$9,000幾蚊人工,結果獲通知只有$5,000;扣減已購買嘅美容療程之後,仲要倒付公司約$18,000。世界仿如天崩地裂,佢一直以為人工可以抵銷所有購買嘅產品,原來通通都係幻象。

最後,Maggie提出救贖方案,教導Peggy只要向同學仔推銷美容或瘦身項目,成功售出就可以獲得佣金嚟抵銷欠款。Peggy心慌慌,又無主見,理所當然就聽話成為咗Maggie下線。好在,佢向某個朋友推銷嘅時候,向朋友完完本本咁敘述咗呢個月嘅遭遇,先至醒覺到:「我畀人呃咗!」


NG事項

1. 購買自家公司美容產品

騙徒手法層出不窮,而家啲公司未必會一返工就叫你付費購買某類美容課程,反而會陸續引導你心底嘅購買意欲。咩員工優惠、咩「見係你先有」……目的只得一個,就係令你心甘情願地打開銀包,不斷碌卡!同埋,千祈唔好相信,購物嘅費用直接由人工扣減,呢個絕對係史上最大伏。除非係合約寫明而你又傻豬豬咁簽咗,否則正正常常一間公司點都會分清楚兩件事。

都係嗰句,未收人工先洗錢,梗有古怪啦!


2. 人工計法變變變

工作之初,僱主應該同僱員清楚解釋工資嘅計法,並簽定合約作實,保障雙方利益。如果公司轉咗新制度,計算人工方式改變,而更改又不合情理,應該要提出,絕對唔可以上面講咩、要求咩,打工仔就無條件接受。


3. 小心層壓式推銷

當Peggy變成Maggie下線,被教導向同學仔推銷美容或瘦身項目,成功售出即可獲得佣金抵債,暗示佢透過「拉人頭」、從招攬新人中取得利益,有機會觸犯《禁止層壓式計劃條例》,千祈唔好亂試!


騙徒往往都係先將自己包裝成一個正人君子,到取得受害人嘅信任之後再慢慢從你身上攞著數。所以新相識嘅人無論對你幾親切都好,當佢要求你作出任何重大決定(例如簽合約、付費)之前,一定要先徵詢親友嘅意見,諗清楚佢背後嘅目的係乜嘢!

 

延伸閱讀:

暑期工中伏實錄(2):這間書店很古惑

暑期工中伏實錄(1):「Internship」定係廉價勞工?

一次過解答Fresh Grad今年搵工嘅疑難

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案