[暑期系列]盤點六大intern奇行種

暑期系列 盤點六大intern奇行種

每逢暑假,好多公司都會請啲intern返嚟,每條team塞一隻,貪佢哋平平地,可以舒緩吓同事人手不足嘅怨氣,等佢哋冇聲出;同時又可以建立吓企業形象,喺CSR report度寫吓公司幾咁注重培育社會未來棟樑,簡直係一箭幾鵰。

條team多個人做嘢當然好,不過如果不幸遇上「奇怪煙腸(intern)」,隨時幫忙變成幫倒忙。


1. 毫無主動型

有啲intern可能習慣咗做學生嘅模式,老師叫做功課先做,以至返工時都係踢一踢,郁一郁。佢哋嘅口頭襌係:「你又唔講,我點知要做?」「你又冇講幾時要交,我點知你急要?」「你又冇話要幫手,點解我唔可以做自己嘢?」其實調返轉,你身上又冇裝GPS,你唔主動講,人哋都唔知你幾時做完手上啲嘢㗎。

曾經見過不止一個intern,做完手上嘅工作後,「以為冇嘢做」,於是就坐喺個位瞓覺,其中一個仲要係「後仰擘大口式」瞓法,蔚為奇觀。一陣老細經過見到,又會質問啲同事「點樣帶新人」㗎啦。

不受歡迎指數:★★★☆☆

暑期系列 盤點六大intern奇行種


2. 求其交貨型

有一類intern,可能係覺得上司交畀佢哋嘅工作太簡單、太瑣碎,侮辱咗佢哋嘅智慧啦。朋友A曾經帶過一個intern,叫佢砌一個PowerPoint,第一頁格式已經整好咗,intern只需要copy and paste之後嗰百幾頁就得;Intern非常快手就做完交貨,喺度玩手機。

點知朋友A一檢查,嚇然見到啲圖同字全部錯晒位,font又唔統一,於是叫佢改返啦,佢竟然話:「我真係睇唔到有問題囉。」朋友A知道拗落去都冇用,結果都係死死地氣自己慢慢改……遇上求其交貨嘅intern,計返你開頭教佢同之後自己慢慢執嘅時間,可能仲耐過自己親手做。

不受歡迎指數:★★★★☆


3. 目中無人型

見過有啲intern成日黑口黑面,朝早唔會講早晨,走唔會講再見。唔緊要啦,做到嘢就得,點知帶到出街先出事。話說某次叫該intern幫手做reception,佢問個客攞卡片填資料,還返張卡片時,竟然係用「食指同中指夾住」咁樣遞畀佢,嚇到一眾同事差啲大叫「Oh my god!」

另外亦聽朋友分享過佢公司請過一個intern,佢好醒、好做得嘢,但一見到有問題嘅嘢就會不留情面咁插。佢last day嗰日,竟然入房同老細講哂全公司每個部門有咩問題,啲manager點樣唔掂,之後就走咗去;老闆當然勁buy佢咁做,而一眾可憐嘅中層就要承受惡果……可能intern覺得佢咁做係對公司好,但凡事最好都係留一線,除非肯定自己第時一定可以做到老細嘅位,個個聽晒佢話啦,否則「出得嚟行,預咗要還」。

不受歡迎指數:★★★★☆

暑期系列 盤點六大intern奇行種


4. 皇親國戚型

有啲啲老細好鍾意搵自已親友嘅仔女、客嘅仔女,甚至自己嘅仔女入嚟做intern。遇著呢類intern,有時真係唔係好識點「帶」佢哋。鬧又唔鬧得,驚佢哋返去同daddy訴苦;又唔敢畀啲太簡單嘅嘢佢哋做,驚佢哋同daddy話公司睇唔起佢哋。

最痛苦嘅係,當佢坐喺自己條team入面嘅時候,感覺就好似身邊多咗一部人肉CCTV咁。如果咁啱俾佢見到你用WhatsApp、睇Facebook,仲唔成為佢同daddy茶餘飯後嘅開心話題?

不受歡迎指數:★★★★★


5. 貴族子弟型

作為「皇親國戚型」嘅一條分支,其實呢類intern做嘢同態度未必有問題,只係你唔太明點解佢要入嚟做intern,同埋唔識點樣同佢哋相處,因為佢袋入面啲零用錢隨時等於你半個月糧。

曾經見過一個intern妹妹跟team出去搞event,阿姐千叮萬囑大家要好好招呼個重要嘉賓。點知個嘉賓一嚟到,即刻鬼咁開心咁同intern妹妹打招呼,原來佢係intern妹妹嘅細叔伯……之後佢哋兩個行埋一邊,一路食event啲點心,一路傾到眉開眼笑:「你幾時畢業呀?我refer你入嚟我度做啦……」(100%真人真事)

不受歡迎指數:★☆☆☆☆(純粹係葡萄心理)

暑期系列 盤點六大intern奇行種


6. 努力實幹型

最後,公道啲講,除咗以上類型嘅小眾之外,筆者遇過嘅intern其實大部分都係好好嘅。好多intern一開始真係未必識做,但會拎住本notebook同筆,好細心咁記住啲步驟,好勤力咁去做,遇到唔識做或者做錯嘅地方,亦會虛心咁問同改正。有幸遇上呢種intern,真係幫到大忙,可以為成條team帶來朝氣同愉快嘅兩、三個月。有時知道intern弟弟妹妹畢業後,搵到一份好好嘅工,成就甚至好過自己,會真心為佢哋感到高興,就好似見到自己細佬妹成材一樣。

受歡迎指數:★★★★★★★★★★


其實年輕一代成日覺得班舊人針對、睇唔起佢哋,當然世上的確係有好多無料扮四條嘅old seafood,但都不妨檢討返自己,係咪已經做到最好先。如果自己真係有料到嘅,以後大把機會可以理直氣壯咁大返班廢中/廢老啦,係咪?

 

(圖片來源:WhatsCap

 

延伸閱讀:

公司三文治——中層管理最抑鬱

職場心理學(一):工作壓力管理

Develop your winning personal brand

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案