有呢七大性格特質 做前線零售無難度

有呢七大性格特質 做前線零售無難度

正所謂甲之熊掌,乙之砒霜。做一份唔啱自己做嘅工,當然會覺得返工極之惡頂,度日如年;但如果份工係適合自己性格,就隨時得心應手,月月爆數。做緊前線零售業嘅你,又覺得每日返工係受緊酷刑,定係做返自己自然嘅一面?即刻睇吓自己有冇呢七大前線零售業性格特質!


1. 親和力

冇人會鍾意同粗聲粗氣、黑口黑面嘅人相處;更何況啲客人覺得自己畀錢就好高貴,要所有人都客客氣氣,笑面迎人對住自己。所以如果有班麻煩客對你呼呼喝喝,仲要搲折如果唔畀就投訴,但你都可以保持無敵嘅親和力同埋烚熟狗頭嘅笑容的話,唔理真情定假意都好,你已經成功咗一大步。


2. 識睇眉頭眼額

有啲客見你掛住執貨,冇主動上前同佢推介產品,就覺得你唔專業、唔識待客之道;但有啲客就鍾意自己靜靜地逛吓,主動去幫佢(有時係公司規定)反而會覺得你阻住晒、畀壓力佢。所以做前線要識睇眉頭眼額識自動走位,對唔同嘅客人做適當嘅事。


3. 記性好

如果你喺名店返工,有個大明星入嚟買嘢問價錢,而你竟然要喺佢面前check價錢牌,你話幾失禮呢。就算係一般舖頭,客人問你有咩款、有冇貨、啲貨擺喺邊、幾時有貨返,你都識答,咁至叫專業。如果你可以認得啲客人,同佢打招呼、吹吓水嘅話,仲有機會變成熟客添。


4. 轉數快

推銷並唔只係機械式咁介紹啲產品嘅好處,而係識得將適合嘅產品介紹畀客人。有位賣中高檔廚具嘅媽媽級sales分享,有次佢間舖啲煲唔小心撞崩咗,個老細就勁愁:「崩咗嘅煲點賣得出呢?」有一日媽媽sales見到有個後生女仔入嚟鬼鬼竄竄咁睇嘢,一問之下,原來個女仔啱啱自己搬出嚟住,又要半工讀,所以其實冇錢買,只係入嚟睇吓、開心吓。媽媽sales就推介:「呢隻只係崩咗少少啫,我半價賣畀你。」於是隻煲就成功賣咗出去,個女仔仲介紹埋啲朋友嚟買添,個老細高興到差啲攬住媽媽sales嚟錫。


5. 有耐性

有啲客買嘢時總係好堅持要試勻晒十幾款,問埋啲古怪問題又要彈三彈四(「間廠喺邊度㗎?日本製?我就唔信啦咪又係大陸嘢」),眼見佢摷亂晒啲嘢之後又要同佢執返,但係未到最後一刻都唔知佢係咪真係會買。你又有冇耐性堅持你嘅笑容,服務到最後?


6. 同理心

客人行入嚟間舖頭,除咗買嘢之外亦係享受緊購物嘅體驗,所以要識得理解佢哋嘅需要。有sales分享話有次一位微胖嘅女士問佢件衫應該要咩size好,佢好老實咁答:「你著大碼啱㗎啦!」跟住位女士黑面走咗;後尾諗返其實可以婉轉啲講:「你著中碼都得,不過呢件個碼有啲偏細,俾我就會揀大碼著得舒服啲!」咁咪唔會hurt到個客之餘又簽得成張單囉。


7. 淡然的平常心

自從2002年劉華個廣告出街之後,總會有啲麻煩客話你服務態度唔好、有錢都唔識賺、威脅要投訴你甚至報警。每日積積埋埋咁多怨氣,谷住喺個心度,遲早黐線。所以做前線零售,要識得用平常心面對呢啲批評,大而化之,明白客人只係想發洩而非針對你個人。日子有功,便可練成金剛不壞之身。

  

延伸閱讀:

做銷售的心理質素

面對蠻不講理的客戶來電,你會如何應對?

[職場故事]能屈能伸才算是成功的上司

想搵零售業好工?想知唔同職位可以搵幾多?即刻上「Retail Frontline 前線零售業專頁」睇睇!

 

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案