見工簽約前 勞工法例你要知！網民：面試公司有薪病假一年3日有冇犯法？

有網民向Facebook專頁「奴工處」投稿話：見工嗰陣，老細講明：「如果你哋成日病，就唔適合做呢份工。」事關該公司一年只有3日paid sick leave，咁有冇違犯勞工法例呢？

帖文一出，網友身同感受：

「勞工法例無講普通病假（姐係一兩日嗰d）要有薪，所以佢唔犯法。」

「我公司一日都冇，請病假當事假處理，扣假，冇就扣錢，得閒死唔得閒病。」

「見工果時講明其實ok。咁你take offer就預咗，出糧俾你射波咩。」

「勞工法例係咁cheap，不過如果間公司跟足佢無人工既話，咁cheap既公司我都唔會做。」

有興趣的讀者可睇番原文             

▪ 被停工、裁員冇得say？打工仔「逆境自保4步曲」認清勞工法例

▪ 【不幸被裁】遣散費、長期服務金、年假點計？被解僱要做齊的8件事

難得見工成功，終於獲得一紙聘書！正滿心歡喜，咪住，得3日有薪病假咋，原來已經慷慨過唔少公司。打工仔務須留意僱傭合約內容，你以為係必然擁有嘅權益，實則只係一廂情願！除了病假，還有甚他注意事項。

得閒死唔得閒病

睇網民回應，就知好多公司連1日paid sick leave都冇，而且完全不犯勞工法例。因為根據香港《僱傭條例》，按連續性合約受僱的僱員，如符合以下條件，便可以享有相等於每日平均工資5分之4的疾病津貼：

1. 放連續4天或以上的病假；

2. 放病假前已累積足夠的有薪病假；及

3. 僱員能夠出示由註冊醫生（西醫、中醫或牙醫）簽發的醫生證明書，或僱主提供衛生署認可的醫療計劃下的醫生證明書。

換言之，打工仔病一兩日，申請放少過4天的病假，公司可以不出糧以至扣勤工獎。那些放一日病假都有薪金或幫補醫藥費，有些「大方」公司且不需員工出示醫生紙，係超出勞工法例的福利，用來留住員工的招數！

現時令全人類苦惱嘅新冠肺炎，政府指不屬《僱傭條例》所指定可獲補償的職業病。萬一唔好彩確診患上或須隔離檢疫，都係按上述原則領取疾病津貼。不過政府鼓勵僱主因應情況彈性處理。難怪有網民悲鳴：「得閒死唔得閒病！」

▪ 被迫主動辭職、簽協議？拆解5大離職蠱惑招數 裁員潮下免墮勞工陷阱

▪ 【Fresh Grad搵工】6大新工簽約事項 注意隱藏細節防中伏

打風WFH

搵到工，一定會睇清僱傭合約列明有幾多日年假，不過當中肯定沒有「打風假」一項。10月中旬浪卡襲港，正好印證事實如此。當日8號風球生效一整天，卻無風不起浪，大部分港人毋須上班，以往可以暫且不理公司事務，但在新常態下，早前有些打工仔在疫情下轉為work from home。如今打風嘛，同樣不用返office，就居家工作，開視像會議諸如此類。因為公司有出糧，員工受人錢財替人消災，須照樣辦公。

按照勞工處訂立的《颱風及暴雨警告下工作守則》，僱員毋須上班，僅限於因惡劣天氣影響，導致難以安全往返工作地點之情況。當企業實行「在家工作」的安排時，員工無需往返工作地點，而「屋企」屬於安全地方，僱主可要求僱員在惡劣天氣下，留在安全的家中繼續工作，再無「打風放假唔做嘢」呢支歌仔唱嘞。

花紅見財化水

求職者獲企業聘請後，人工之外，對雙糧花紅最為關注，那更要check清楚書面合約所指員工享有年終酬金。無論名稱係雙糧、第十三個月糧或花紅什麼，兼無寫明有酌情條款時，僱主不管賺與蝕，都必須發放這些年終酬金。但有些僱傭合約講明年終酬金屬酌情發放或償贈性質，如「僱主有最終酌情權」，或「視乎經營情況而決定發放與否」，便不保證年尾流流一定收到雙糧花紅。尤其企業該年度財政狀況不理想盈利欠佳的話，多會要求員工「共渡時艱」，年終酬金就凍過水了。

溫馨提示：求職者謹記，即使無白紙黑字的書面合約，口頭承諾或過往慣例，亦可構成僱傭合約一部分。以上提及的勞工法例，詳細條款可瀏覽勞工處網站。