林日曦專訪(一):我成功,因尚未執笠,但係遲早的事

 IMG_0012

在葵涌的一座工業大廈內有這樣一家公司:沒有大公司的氣派,但這裡卻是香港近一兩年備受年輕讀者和觀眾追捧的《100毛》雜誌以及毛記電視的大本營,當中的核心人物,創辦人之一林日曦就在其中一間沒有大班椅,沒有L型檯,更加沒有海景view的老闆房內接受jobsDB的專訪。

 聚會時一句「搵D嘢搞咯」,《黑紙》誕生了

「有一句嘢好多人係聚會嘅時候都會講嘅:不如搵D嘢搞。去到20尾,好多人係自己工作上面,又未至於話唔中意,但總係覺得好似重複緊一D嘢,又或者同好多其他人一齊合作一個project,未必做到自己嘅嘢,咁不如自己搵D嘢搞,好多人都會咁講,不過我地講講下,就真係搞咗出來。」

  顛覆傳統: 出一本一張紙的雜誌

「我哋在諗做咩的時候諗咗好多,最後選擇做一張紙的《黑紙》雜誌係因為,首先我哋幾個係工餘時間做,未必有好多時間同心機。第二,我地當時嘅諗法係,新一輩人的閱讀模式是短嘅,一本厚嘅雜誌未必睇得完。最後,我哋希望可以在創作上有形式上的顛覆,點解一張紙唔可以叫做雜誌呢?」

 《100毛》:搞笑得來,仲顛顛哋

「到2013年,我同兩個拍檔都陸續辭去正職,全職投入,我哋就想搞另外一本雜誌。《黑紙》雖然幽默,但係較批判性的雜誌,社會性很重,而且講較多內心嘢,好heavy。我們想做另外一本,完全係幽默感行先,係會令人發笑嘅雜誌。於是就係2013年3月,創辦《100毛》。其實創辦初期無咁顛嘅,條套路係慢慢摸索,直至有一期張家輝拍《激戰》好hit,我們在考慮用咩封面嘅時候就諗,不如搵人扮張家輝啦,而且好快地諗到不如搵阿Bob扮啦,估唔到阿Bob無乜考慮就即刻應承。當時拍攝現場D人已經笑翻了,我地都已經知道掂。果然出來就成為史上最爆嘅一期。確立咗《100毛》搞笑得來,仲顛顛哋的風格。」

  毛記電視:最緊要唔好睇咗都話咁啱睇到

「近幾年電視係一個好hit的話題,大家都對佢有好多不滿,包括某細台經常被取笑,“大台”都係,可見大家幾“愛”佢哋。而最致命嘅係,大家唔止唔睇電視,而且還以睇咗為恥辱,好似明明有睇《愛·回家》,但在網上討論區就偏偏話係阿媽開住部電視咁啱睇到,跟住就開始鬧,最後仲要括著(利申:咁啱睇到)。我覺得呢個情況,好笑之餘,都幾可悲。曾經,電視對於香港人係一個共同話題,但現在無咗呢樣嘢。基於對電視的一個情意結,我哋就諗,不如做電視啦。呢個係一個瘋狂嘅提議,因為無錢。咁點搞啊?於是就諗不如係網度做電視啦。我覺得有無牌照,節目係咪定時定候,同埋係咪一個鐘半個鐘,都唔重要,最緊要鍾意睇就得啦,同埋睇完唔好話咁啱阿媽開著電視睇,咁就已經達成目標了,於是就搞咗無記電視啦。」

 我覺得自己成功,因為我還未執笠

「我哋個標準好低,唔執笠就成功了。因為呢個世界變化太大啦,每一日都變緊。一年前,邊個諗到《忽然一週》會執阿?無人諗到,因為無人知道個趨勢。係呢個情況下做媒體,好容易被淘汰。所以今時今日我哋都仲未執笠,所以非常成功。一年之後,《100毛》會唔會執?我都唔知啊,隨時執嘎。毛記電視會唔會執?可能都會執,趨勢呢樣嘢就係快到咁。」

 未來:《100毛》遲早執笠

「《100毛》日後的發展?執笠咯,遲早一日執笠啦,邊度仲有人買紙啊?我哋最初幾個人做嗟,最多唔出呢本,出過第二本,唔會死嘎。毛記電視就估唔到,想像空間大D,不過我有諗過年尾獨立做一個總選。我哋有一個節目叫《勁曲金曲》,咁不如做一個《十大勁曲金曲頒獎典禮》,係自己搞,唔係依附係人哋度。」

 (待續)

 

同場加映 Project Lucida -香港中文大學講座: 林日曦的創作路