每個新仔都犯過自以為會毀滅世界嘅錯誤

每個新仔都犯過自以為會毀滅世界嘅錯誤

(網絡圖片)

踏入五月,又係畢業生群起搶閘搵工,成為職場新力軍嘅季節。喺呢一刻,每位職場新人都會對自己嘅前路有所憧憬:「我要五年內升到管理層!」「我要廣交人脈,第時自己創業!」「我要同上司同同事打好關係,喺佢哋身上學到最多嘅嘢!」

但係,相信好少人會預想自己會喺公司點樣「犯錯」。諸如send錯email畀同名嘅recipient、唔記得加attachment等小事,都係每位新人嘅必經階段。除此之外,其實每個新仔喺職場路上,總會犯一啲當時自以為會毀滅世界嘅「大錯」。

—–

一個新人喺公司可以犯到幾大嘅錯?或者小編都分享一段小小嘅往事──話說某次公司要搞一個幾百人嘅講座,而小編就負責搵vendor做台上嘅backdrop。但係因為溝通上嘅錯誤,當日整出嚟個backdrop,竟然遮住咗場地個大screen……結果雖然場地臨時幫我哋搵咗個7呎嘅portable screen返嚟,但坐喺最後排嘅觀眾真係睇條毛。

因為呢單嘢,小編當然俾人照肺照到上天花板,事後亦都消沉咗一段日子。不過相隔幾個春秋,咪仲係一條好漢生勾勾。從此亦知道同vendor溝通,一定要問到對方煩為止:「真係咁?你sure真係得?如果唔得咁點先??」

—–

當然,正如梅菲定律所講:「Anything that can go wrong will go wrong.」到底職場新人犯嘅錯有幾層出不窮?外國網上論壇就有網民分享自己做新人時(或新人同事)嘅犯錯經歷:

  • 駁錯線燒咗成間office。
  • 公司同UPS傾緊單巨額生意,但用錯咗FedEx將份proposal寄出去,結果單生意傾唔成。
  • 捧餐時錯手推跌咗5杯凍飲落一位坐輪椅嘅婆婆身上。
  • 寫錯一句code,delete哂成個database 8萬幾個客戶record。
  • 喺機場錯手熄咗管制系統嘅某條無線電頻道,令所有飛機無法起飛10分鐘。
  • 幫個客戶send宣傳電郵,但下款嘅公司名寫錯咗做「某人」,結果大量人打入嚟問係咪詐騙電郵。
  • Set錯咗網上廣告嘅設定,令公司喺一日之內損失咗一百萬廣告費(美金)。
  • 報錯咗條橋嘅高度,令人哋隻船成個頂批咗落嚟。

—–

呢啲犯錯經歷,其他人當然係當笑話咁聽,但當事人嗰一刻往往會覺得係一生人中最黑暗嘅一日……不過幾年後,當小薯變成職場老手,件事已經慢慢淡忘,通常最多都係gathering時俾同事攞出嚟笑吓;或者放喺心入面,每次想起都不禁莞爾一笑,同埋感激當日省到你甩皮,但係喺老細面前維護你嘅上司。

如果唔係當日自己犯咗啲咁白痴嘅錯誤,而家點會識得迴避再次犯錯,同埋當後輩犯白痴錯誤時識得幫佢哋拆解?到自己老咗諗返轉頭,冇啲白痴回憶俾自己笑吓又點得呢?各位職場新人,唔好怕犯錯,因為每次嘅錯誤都係寶貴嘅經驗!

每個新仔都犯過自以為會毀滅世界嘅錯誤

(網絡圖片)

 

資料來源:
Quora: “Internships: What is the most catastrophic mistake made by an intern at a company?” 
Reddit: “What is the worst mistake you’ve seen someone make at work?
Reddit: “What was the biggest mistake someone new at your job made?

 

延伸閱讀:

[問到口啞啞]見工壓你價口術大全

一次過解答Fresh Grad今年搵工嘅疑難

有一種複雜關係…叫做辦公室關係?

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案