過去幾個月，大家有冇發現公司人事變動多咗？除咗搵工跳槽或者退休，有一部份嘅同事可能係去其他地方搵食。例如新加坡嘅金融機構擴充緊，有啲外國國家亦吸納緊香港嘅專業人才。
如果你都有打算出去闖一闖，咁就有一件事係最好趁早做好，以免夜長夢多嘅。呢個手續，叫做「清稅」 （tax clearance） 。
點解要清稅？順手拈來都有三個理由
首先，你離港前最後一期人工，理應由僱主 hold 起，等你同稅局辦妥清稅手續之後，稅局會出信通知僱主可以放行嘅。換句話講，想收埋最後一期糧，請記得清稅。
再者，交稅係良好公民應盡嘅責任。如果短期內唔會再喺香港工作、再無香港稅務事宜，喺離港前結清餘款，乾淨俐落，何樂而不為？
如果大家要多少少誘因嘅話，不妨諗埋呢一點：大家平時繳交薪俸稅，係按稅務年度咁畀錢嘅。呢度有一部份係剛過去嘅稅務年度 （例如 2020/21） ，另一部份係預繳而家呢個稅務年度 （例如 2021/22） 。
如果你喺 2021/22 年度有部份時間唔喺香港工作，你喺呢個年度要交嘅薪俸稅就有機會低過你預繳咗嘅部份。即係話，離港前清稅係有機會收返退稅支票嘅！ （不過都有機會係你預繳嘅銀碼唔夠冚應繳款項。長氣啲講多次，交稅係良好公民應盡嘅責任，乖啦。）
▪ 半數打工仔願出走打工！令人嚮往海外工作地點：英國加拿大增幅明顯
▪ Freelance要報稅？8個Fresh grad報稅疑難須知 扣稅證明要留幾耐？
清稅四大要點須留意
好喇，咁各位銀行同金融服務界行家，喺辦理清稅嘅時候，又有啲咩特別要留意呢？
1. 時間上的安排
根據稅務局嘅指引，大家需要喺離港前至少一個月，通知僱主及稅局離港嘅安排。呢個當然係 bottom line 啦，大家辦理手續都要時間嘅。
而喺現實之中，大家離職嘅通知期往往由一個月至三個月不等。即係話，遞辭職信嘅時候好有機會比起稅務局嘅要求更早。冇壞嘅，因為你要僱主，即係公司嘅 HR ，幫你準備 IR56G 表格。正本交去稅局，副本畀你拎去稅局辦手續。
各位有同 HR 交過手嘅朋友多少都明白，金融機構往往人強馬壯， HR 日理萬機仲有萬七咁多個同事要照顧。你嘅離職，除咗一紙IR56G ，仲有計年假、計尾期糧以至請繼任人等功夫要做。
所以，及早通知 HR 自己需要清稅，既預留足夠時間畀 HR 做嘢，亦都確保自己唔會臨急抱佛腳。
2. 清稅的理由
有啲朋友對於向公司披露自己離開香港嘅計劃有所保留。明嘅，好多時大家都情願低調行事，唔想全世界都知道自己打算去第度工作或生活。
咁冇咩嘅，凡事留一線，第日好相見。正如大家喺過往辭職嘅時候，都好少喺 exit interview 直接將「頂老闆唔順」或者「好憎某某同事」呢啲原因擺出嚟 （開港有話：「真嘢唔好攞出嚟講吖嘛」） ；咁大家想向外闖，背後嘅原因係一回事，講出嚟畀公司聽嘅理由亦可以係另一回事。冇牴觸㗎喎。
想進修又好，想同屋企人換吓環境又好，甚至乎 take 個 career break ，都係一啲講咗出嚟，冇咩人有 hard feeling 嘅理由。當然唔排除你老闆可能對於你嘅決定略有微言，但清稅確係《稅務條例》嘅規定，輕重緩急，高下立見。
▪ BNO新政策出爐！港人移民要知：英國各種職業薪水、短缺工種、最低工資及交稅事項
3. 揀日子去辦手續
清稅係需要親自去稅局辦理手續嘅。由於過去半年需要辦理清稅手續嘅人士較以往大幅增加，大家最好預留返半日至一日嘅時間喺灣仔稅務大樓。
如果大家年假好多 （呢一年幾都冇得飛東京或者台北，應該慳埋唔少？） ，當然可以喺辭職之前請定年假去稅局清稅。又或者，如果last day 早過離港日子一個月，就可以索性等離職之後先至抽時間去稅局。
否則，要喺星期一至五辦公時間 （註：負責清稅嘅組別會喺午飯時間閂門） ，撥出幾個鐘時間處理私務，可能會有少少棘手。
4. 計算免稅額
最後，每個人嘅稅務狀況都唔同，要提供畀稅局嘅證明文件都有出入。初出茅蘆嘅朋友可能未必用到太多免稅額，但係好多行家都有機會用到以下嘅免稅額：
-
已婚人士免稅額
-
供養父母或子女免稅額
-
進修開支扣稅
-
慈善捐款扣稅
-
購買自願醫保、合資格延期年金及自願強積金供款扣稅
-
居所貸款利息扣稅
如果以上項目適用於大家嘅情況，咁就請盡可能湊齊證明文件先好去稅局喇。比較穩陣嘅做法，係帶夠至少過往 3 年嘅供樓利息結單、學費單同保費單據之類。
萬一你層樓曾經轉按或加按，咁就有機會要提交更早期嘅文件去解畫。一般嚟講，銀行係可以印製返相關紀錄畀你嘅。差在費時失事啫。
正所謂時間就係金錢，清稅只係離港前眾多要處理嘅事項其中之一。能夠做好準備，一次過搞掂，慳返啲時間同其他親朋戚友餞別咪仲好？
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
