溫馨辦公室 三大最佳戰友

進入職場之後,每日對住同事嘅時間肯定多過阿媽!今次小編就搜集唔同嘅溫馨辦公室窩心事件,整理出三大類抵錫好戰友!

第一類:大眾家姐,好識照顧人嘅同事
第二類:免費小食部,總有無限食物供應
第三類:有難同當義氣仔女,有氣一齊受

如果你身邊都有咁好嘅同事,返工幾辛苦都唔怕啦!


1. 大眾家姐,最關心你嘅身體

溫馨辦公室 三大最佳戰友

有時有少少唔舒服,自己都未必覺,但係有辦公室家姐就無有怕!就算突然發燒沾寒沾凍,霸氣家姐同事就會號召大家交出所有物資,然後好似叮噹百寶袋咁瞬間變大量暖水袋、超厚披肩、黑糖薑茶、感冒藥等等出嚟,有佢,放心晒!

好似做會計嘅OL Suki話佢有次腸胃唔舒服,返咗工先開始嘔,成身都無力,佢公司嘅家姐同事就同佢一齊搭的士去醫院,搞到佢少咗時間做嘢,佢都笑笑口話無所謂,嗰下真係窩心到不得了。

做服裝設計嘅Louie話佢嘅家姐同事就係佢上司!上司見佢面色差,血氣唔夠,就送咗成套紅棗水、保溫杯、蜜糖畀佢,仲教埋佢點沖!「呢個家姐上司真係好好㗎,我生日會送名牌手鏈、香水畀我做禮物,去澳洲出trip又買勁多手信畀我。最多謝佢嘅一點,係我參加時裝設計比賽影響咗工作表現,但佢唔單止體諒我,仲話下次早啲同佢講,佢會分配少啲嘢畀我做!仲同我講,如果有需要,可以善用公司資源,靜靜雞叫廠嘅紙樣師傅、釘珠姐姐、車縫同事用特種衣車幫我手,去做我件衫去玩比賽。」

呢個家姐上司對Louie嚟講仲有一份知遇之恩,事關佢畢業後有足足三年無做過design嘅野,而呢份工係佢第一份搵嘅design工,而家姐上司一in完就決定請Louie,又好肯教同畀機會佢上位、見客、同老細開會。所以Louie話就算成日OT,佢都無咩怨言!


2. 絕不獨食,有好嘢食一齊分享

溫馨辦公室 三大最佳戰友

好多公司都有一個免費(或收費)小食部,但呢個同事本身就係一個小食部,一拉開櫃筒最大嗰格就係一大堆零食。好似做社工嘅Jason咁,佢話有個青春活力妹妹同事好鍾意整蛋糕甜品,又成日都請大家食香蕉蛋糕、紅豆糯米滋等等。「最勁係有一次,妹妹同事去台灣玩,嗰間x帥芋頭蛋糕出名好味,不過又要雪住又重到死,佢細細粒弱質女流居然喺台灣空運兩條返香港,就係為咗畀大家食,超感動!」

Jason又話每年端午節,服務咗公司十年有多嘅清潔姐姐都會送自家製靚糭畀大家食。「有個同事唔食肉,佢仲特登整個素糭,爆晒餡,勁足料又健康無肥肉,個個都話好好味,lunch一齊食糭,好溫暖呀!」


3. 義氣仔女,阿姐發火一齊受氣

溫馨辦公室 三大最佳戰友

做Marketing嘅Amy轉咗工無幾耐就發現阿姐有古怪:「佢好古怪㗎!我一入去時佢就寸啲舊人,話『新同事都做得好過你哋呀,學吓人啦』,搞到我勁尷尬,有啲同事都有啲唔太鍾意我。」好在同期有兩個差不多年紀嘅新同事加入公司,慢慢形成咗一個強而有力嘅心理支援圈,當阿姐無理發火鬧人,大家都一齊受氣;就算有時件project只係由其中一個負責,其他人都會一齊拍心口OT,合力做好件事。

曾經做報紙記者嘅Jasmine就話佢有次寫書評,但係因為涉及敏感政治內容,阿姐就話佢,唔畀佢繼續寫。「我隔離位同事即刻安慰我,話覺得我寫得好好,阿姐好無理,戥我唔抵;我自己都未喊,反而佢竟然嬲到喊咗出嚟,嗰下都幾震撼同感動㗎!佢第二日返工仲送咗蛋黃哥公仔畀我,超級窩心!」


三大抵錫同事,可遇不可求!如果你身邊有一位,就要好好珍惜啦!

 

(圖片來源:WhatsCap

 

延伸閱讀:

Son姐教路:辭職與劈炮

[問到口啞啞]見工壓你價口術大全

應屆大專畢業生平均月入14,978元 四分一不滿首份工作

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案