【炒散攻略】兼職炒散做餐廳酒店侍應,勝在夠自由,賺取現金流

FacebookWhatsAppTelegramEmailCopy Link

在這個Slash世代,愈來愈多人不只做一種職業,「炒散」炒幾份臨時工、兼職以換取生活費和自由的人,大有人在。在眾多行業之中,飲食業流失率高,人手長期短缺,至於工作範疇屬於出賣勞力、手板眼見功夫、較易上手的類別,所以大多餐廳、酒店臨時缺人手或peak season時就會透過一些仲介人來招募炒散人士來填補空缺。炒散年資達3年的90後Raymond,坦言全職、炒散都試過,但自己就偏好炒散的自由模式,無他嘅,空缺多、入場門檻低、搵錢快。

餐飲酒店炒散:門檻低,將勞力轉化為金錢

炒散工作特別的地方是,同一個薪金,吸引來自五湖四海的人,有些人有正職工作但急要錢、有些人在待業中、有些人長期炒散拿現金糧、有些主婦趁空閒幫補家庭收入,有些大學生賺外快儲零用錢。炒散的人,目標簡單而清晰,就是希望選擇彈性工作時間和賺取更多的收入。Raymond分享說,餐廳侍應時薪達至$50至$70不等,酒店侍應則$60至$100不等,相比最低工資每小時37.5元,都叫做仲有段距離,而且散工多數即日出糧,賺取現金流無難度。「我自己就偏好做酒店炒散,酒店炒散可以分為宴會部炒散同餐廳炒散。餐廳炒散,例如會做buffet時段,主要不停加嘢食同收碟,有時要托長盤;而宴會部炒散,專門負責婚宴、公司春茗、學校嘅謝師宴等活動,每年9月至新年係旺季,我旺季試過有$80一個鐘,淡季或經濟唔好就大概$65,當然要視乎酒店檔次同區域啦。另外,仲有個好處係包膳食,有時酒店canteen嘅膳食都幾豐富,變相節省了一筆經常性開支!」Raymond更坦言,「同埋我想申請公屋嘛,做散工好。」

除了錢方面吸引Raymond,彈性工作模式,亦是Raymond長期炒散的原因。「我係一個坐唔定嘅人,以前試過返朝九晚六office work,好悶。同埋我有好多嘢想做,例如搞音樂、剪片等,如果返正職,比較困身,放工、OT後冇時間去夾band、發展興趣。而家市場上有好多專門提供畀人尋找兼職、散工的平台和app,我發現有適合時間、地點的工作就會申請。或者可以搵蛇頭(中介人),蛇頭會畀更我哋揀,時間啱就可以返工。」

▪ 戲院兼職助學生適應職場 賣飛崗位最筍,做帶位員最頭痕:「遲到者橫衝直撞。」

▪ 乞客:餐飲用語圖

Raymond自嘲自己「低學歷」,對缺乏技能和社會經驗的年青人來說,以「男女不限,無需經驗,時薪算高」作招徠的散工絕對吸引。「上求職網見到好多職位都要求員工擁有相關工作經驗、技能,或學歷要求,真係令人好卻步。相比之下,叫得散工,通常都係酒店餐廳急切需要搵人填補空缺,所以對求職者嘅要求便會相對降低。行內炒散嘅朋友都話,只要有手有腳,會呼吸嘅就可以炒散。」

對Raymond來說,出賣勞力,換取金錢,過得快樂過返正職。「等錢使嘅,咪更接更,努力啲踩幾場,如果累嘅想休息,都可以唞兩三日。炒散好easy,唔需要覺得有咩情感責任,呢間做得唔開心,第二日咪唔做囉,好快又可以返第二份。最正係放工就真係放工,唔使將工作帶回家。」

「三無」行列:無有薪假期、休息日以及疾病津貼

炒散雖然可以享受到以上好處,但都係有苦自己知,Raymond話剛開始炒散,都會有少少不知所措。「第一日返工,自己毫無相關經驗,但主管就expect你知道晒所有嘢,好嘅就輕輕講兩句介紹下,唔好嘅就乜都唔講,等你自己摸索。」由於散工次次唔同,有中餐有西餐,做侍應都要有相應嘅傳菜技巧,例如婚宴要識分餸,分量要平均,而西餐就要識set枱同埋上菜嘅禮儀,做錯真係會畀人鬧。此外,炒散算係出賣勞力,搬搬抬抬在所難免,以酒店的宴會為例,場地面積較大,每一道餸菜由廚房送到客人的桌面上,往往需要經過長長的道路,加上酒店的碗碟總是比較重,少一點氣力也不成,Raymond話有時放工都感到手癱,雙手累得軟弱無力。

▪ Slasher不務正業但求自由?九十後斜槓族:「唔想十年如一日。」

▪ 食店老闆的煩惱—大廚超難搵 食店長缺靈魂人物點營運?炒散廚成大勢所趨?

就員工福利而言,亦是其中一個炒散和全職工作最大的區別。根據香港的《僱傭條例》,非連續性合約的僱員屬於「三無」行列,即沒有有薪假期、休息日以及疾病津貼。酒店樓面炒散大多奉行「4118政策」,4118指的是如果僱員連續工作4 星期或以上,而每星期工作最少 18 小時,那麼他的合約便符合「連續性合約」的條件,則會享有勞工保障,在僱員離職時須支付遣散費或長期服務金。為避過相關勞工法例,酒店餐廳或會透過編更的方法,令炒散工在每月的首3周每周上班超過20小時或更多,卻在第4周上班17.5小時,如此已可避開勞工法例的規定。因此酒店樓面炒散既沒有福利,亦沒有工傷,你要炒散,一切後果就由自己負責。

Raymond提到:「飲食場所意外和陷阱多,例如地面濕滑、煮食爐火炙熱、刀叉尖銳亂飛,一唔小心,就有可能中招。但因為做炒散無乜保障,無保險,工傷難以追討,所以自己做嘢要盡量小心。如果明知道工作涉及危險動作,應該堅決拒絕。」

此外,長期炒散的朋友,除欠退休及醫療保障外,因沒有穩定收入,申請信用卡、貸款都較難。炒散亦難計入工作資歷,兼職轉做全職,難以取得僱主信任,影響日後求職機會。

入行有門:

市場上有不少兼職配對平台,如jobsDB的前線兼職搵工網,亦可經中間人介紹,正所謂識人好過識字,識咗個好中介,已是成功的一半。

炒散入行門檻低,入職基本循例問下:「有無做過炒散?知唔知要做咩?怕唔怕辛苦?」沒有甚麼經驗的人,或會被壓$5至$10不等。

此外,食肆通常要求散工穿黑長西褲、頭髮要深色,返工前可準備一下。

待遇:

每間酒店和餐廳給予的時薪都不同,例如高檔次、港島區的酒店,就人工高點;9月至新年,時薪又會高點。

Raymond試過連續6日每天工作16小時,上午到餐廳幫手,下午做婚宴,一星期賺了近六千元。半/一個鐘食飯包餐唔計糧。絕對是多勞多得。

最後Raymond建議,搵工要貨比三家,不要抱住「搵快錢」的心態而畀人搵笨,不妨睇多兩份工,應徵前多了解和查詢,向朋友、前輩請教,以及不要輕信他人隨便答應返工,保障自己。

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

Increase your chances of getting hired. Create a jobsDB profile

Increase your chances of getting hired. Update your jobsDB profile

熱門文章
IT的工作範籌很廣泛,除了我們常聽到的系統研發(即寫網頁/POS系統/手機App等),資訊安全(IT Security)也是一門大學問,近年來倍受重視,不少公司都相繼增加人手。如你即將畢業,或初出社會不久,甚至是心思思想轉行,不妨來聽聽以下...

十大熱門搜尋

Scroll to Top