爵爵&貓叔專訪(一):台港大不同之辛酸血淚工作篇

爵爵貓叔

爵爵和貓叔因創作「台港大不同」系列而在網上爆紅,現今已成本地炙手可熱的插畫師,但原來在成名之初,竟經歷過八個月零收入,借錢度日的低潮……今期jobsDB請來爵爵和貓叔,向大家剖白二人的辛酸血淚奮鬥史。


成就爆紅傳奇……之前

小編:貓叔做全職創作人之前做過啲咩工呢?

貓叔:當年我中學畢業之後,去咗VTC讀廚,之後做咗一年廚房佬。嗰陣喺山頂返工,返朝早八點半,收凌晨兩點,中間有四個鐘落場。但係山頂咁遠,搭程車返屋企都兩個鐘,四個鐘可以去得邊?大師兄又成日撓埋雙手將所有嘢卸俾我做。我好多時攰得濟,唯有匿喺廁所瞓覺。

因為份工太辛苦,頂唔順,我決定去進修,就揀咗去瑞士讀酒店,之後喺台北實習半年。嗰時同朋友出去食飯,friend搭friend咁就識咗爵爵。

小編:爵爵大學好似係讀平面設計㗎喎,畢業之後又做過咩工呢?

爵爵:嗰陣我喺一間保險公司度做內勤,當時嘅人工有30K台幣(約港幣6,900)。雖然喺台灣做平面設計,一般只有22至24K(約港幣5,100至5,500),所以我嘅人工算係唔錯,但呢間公司要我做埋好多冇關係嘅雜務,甚至要捽啲sales跑業績,結果每日都要OT,連星期六、日都要做,而設計就要喺放工之後先有時間做。做到死吓死吓之餘,我亦好唔明白:點解我嘅專長會變咗附加嘅嘢?

嗰陣我先25歲,我就喺度諗,與其捱得咁辛苦,不如去國外啦。之前我有去香港旅遊過,對呢度印象唔錯,覺得咁大地方,做設計應該有得發展,就聯絡貓叔。

貓叔:我有警告過佢香港唔好得去邊㗎!只係表面風光㗎咋!

爵爵:但台灣係表面唔風光,實際上都唔風光呢!


台港打工仔習性大不同

小編:台灣嘅打工仔有幾辛苦呢?

爵爵:其實台灣同香港打工都係辛苦,大家OT都係冇錢。但台灣好多後生仔覺得反正都搵得少,都係買唔到樓,對未來冇乜憧憬,點解唔洗咗佢先呢。於是就成日碌卡同分期付款買嘢,先洗未來錢。

貓叔:係呀,我嗰陣喺台北實習,收工之後一定洗錢,同朋友唱K、食嘢、聽演唱會,我搵得嗰22k(約港幣5,100)一定冇錢剩。我知自己冇可能喺呢個世界生存,所以一實習完就即刻返香港。

爵爵:反而我喺香港會冇乜意欲洗錢,起碼儲到錢。

小編:咁喺工作上又有咩分別呢?

貓叔:我覺得同香港相比,台灣啲人返工太hea,效率太低,OT又多。有時啲台灣同學可能恃住自己係本地薑,就將啲嘢卸哂俾我做,佢哋自己就游手好閒,但因為同佢哋friend,又唔好意思推。不過當出咗事,佢哋都會幫返你,一齊揹嘅,雖然壇嘢係佢自己搞禍,哈哈哈。


為五斗米在城大canteen唱兒歌

小編:咁你哋初初返到嚟香港,搵啲咩工嚟做呢?

爵爵:嚟到香港之後,我見咗一間playgroup,因為佢兼賣兒童產品,所以要搵設計師做美工,同時照顧小朋友,仲指定要搵台灣人,因為可以教小朋友國語,又要教英文、講故事、跳舞。我總共面試咗四次,最後一次面試就喺城大canteen,要我當眾即場跳舞唱歌,我就好high咁大叫:「各位小朋友!」仲講咗個故事俾佢聽。

貓叔:成個傻仔咁!

爵爵:後來我問貓叔,喺香港嘅面試係咪都係咁,佢話唔係喎……呢份咁高要求嘅工,月薪只有港幣8,500蚊。

貓叔:8,500做咁多嘢算吧啦!

爵爵:但台灣人喺香港搵工真係好難!我又冇身分證,公司請我又要洗錢開working visa,做乜唔請個香港人?你又唔係特別勁。我本身仲等佢請我,雖然後來間playgroup根本開唔成。

後來我哋開始合作畫圖,完全係為咗塞住阿媽把口……

 

(待續)

爵爵&貓叔專訪(二):合作畫圖只為塞住阿媽把口

 同場加映:Project Lucida – 香港中文大學講座:爵爵&貓叔創作講不停

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案