爵爵&貓叔專訪(二):合作畫圖只為塞住阿媽把口

爵爵貓叔專訪2

上回講到爵爵辭去「OT無限期」的台灣工作,一心來到香港發展設計才能,隨即落難加入失業大軍……本地薑貓叔如何拯救他呢?


被躁底老闆折磨一年

貓叔:後來我入咗一間公司做,又介紹爵爵入嚟做,做咗一年,佢做設計,我做主管。(小編:即係你管住爵爵?)其實係乜都要管嘅打雜啫。

爵爵:但我哋兩個都做得唔開心,做唔到我哋想做嘅嘢。我啲設計成日綁手綁腳,改完又改,做到成隻喪屍咁。

貓叔:我個位其實應該係可以做決策,但現實中只係做咗老闆嘅打雜、砲灰、傳聲筒。佢每個月都會整一鑊嘢我歎,好似有次收工,我去咗剪頭髮,剪完之後發現佢竟然打咗48個來電俾我,叫我即刻返公司整嘢。半年後,佢升我做總經理,幾日後佢竟然話我做錯嘢,撻返我落嚟,但我已經印好卡片派哂俾啲客,不知幾唔好意思。

不過,呢啲都係人生嘅歷練。如果冇做過呢份工,我唔會識得對客嘅態度,唔會識點樣應對一啲好鬼麻煩嘅客,可能宜家就會俾佢哋撳住嚟砌。


無心插柳 塞住阿媽把口

貓叔:因為做得唔開心,我哋兩個一齊辭職,諗住一定搵到工啦,點知原來十月真係好難搵工。我就俾阿媽話廿幾歲仔日日坐喺屋企打機……

爵爵:而我阿媽就一直都叫我返台灣,一來我俾少咗錢俾屋企,二來又一年先見得佢哋一次。但我自己唔想返,因為一場嚟到,就咁返去好瘀㗎嘛……咁就諗,不如搵啲嘢做吓囉,於是就選擇咗畫圖post上Facebook。

貓叔:其實我哋只係想搵啲嘢塞住佢哋把口,因為佢哋又唔係好識Facebook,我哋就話自己做緊啲Facebook嘢,可以賺到錢嘅,又一路俾佢哋睇吓我哋啲畫,話係做緊藝術家㗎。當然嗰陣仲係零收入啦,哈哈。


八個月零收入 借錢度日

小編:所以初初畫圖其實唔係為咗搵錢?

爵爵:一開始我真係冇諗過用畫畫嚟賺錢㗎,起碼我自己唔係囉……

貓叔:即係你覺得我係為錢㗎?多謝哂喎。

爵爵:你,你,你都唔係,因為……

貓叔:Clarify返先,我真係唔係囉。

爵爵:(嘗試轉移話題)我……我哋開page……因為嗰陣……

貓叔:(背後靈mode)哇好嘢喎你呢吓,卸膊卸得咁靚嘅你……

爵爵:你SHUT UP!!!!!!!

貓叔:……

爵爵:因為開咗個page後八個月,其實都一直係食穀種,靠自己積蓄維生。

貓叔:到後期我真係完全洗哂啲錢,見咗底,要問朋友借錢,同埋夜晚去酒吧打工做bartender,因為可以唔影響日常畫畫同做訪問。嗰陣訪問真係好多,日頭做訪問,夜晚打工,好唔夠瞓,身邊嘅人擔心,自己更加擔心。


小編:有冇想過要有咩成就?

爵爵:完全冇,嗰陣好消極㗎,冇收入,冇目標,但有俾底線自己,如果真係生活唔到就要出去搵工。

貓叔:但相比起好多插畫家,我哋已經好幸運。好多人捱咗半年先出頭,而我哋五日就出咗名,有第一間出版社搵我哋,第二個月就開始有合作。

但嗰時我哋仲係新人,唔識bargain,有啲job拖到半年先俾錢,所以第八個月後先有收入。到洗哂啲錢,唔知點死嘅時候,突然又有個合作,有少少錢吊住條命,隔幾個月又一單吊命。

其實我哋條路算行得幾順,我哋識好多插畫家都努力咗好耐先出名,同埋真係做唔住嘅時候,要逼住轉plan B。

爵爵:另外都因為我係台灣人,人在異鄉,冇第二條路揀。茶餐廳都唔請你啦。

爵爵貓叔專訪2 (待續)

同場加映:Project Lucida – 香港浸會大學講座:爵爵&貓叔創作講不停

爵爵&貓叔專訪(一):台港大不同之辛酸血淚工作篇

爵爵&貓叔專訪(三):堅持黑白、祼體、流血、第三隻腳

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案