網上流傳很多酒店和餐飲業的壞消息：大劈價、客人低見3成、員工凍薪⋯⋯零售業也不遑多讓。統計處公布最新5至7月的失業率，零售、住宿及膳食服務業錄得4.3%，看似不妙唷！實情到底如何呢？長工的失業風險上升，那兼職是否更加岌岌可危？小編邀來3位零售業的前線兼職，細說他們的實況，以及對前景的看法。
Carmen：連鎖韓國女裝服飾店，做兼職長達3年
May：家居精品店，兼職1年
Ella：Sogo／特賣場／展銷會等活動的兼職銷售助理，入行5年
編：統計處公布最新兩期（5-7月；6-8月）的失業率為2.9%，結束以往14個周期的不變紀錄2.8%。有零售工會表示，因為近期的政治風波，生意轉壞，僱主需減聘散工和兼職，你會害怕影響到你的工作嗎？
Carmen：我喺呢間韓國女裝服飾店做part-time，做咗3年幾，逢星期五、六、日返工，暫時無收到風話會停part-time。認真計吓，我哋舖頭呢幾個月生意無受咩影響，顧客人數無明顯少。我人工除咗底薪，仲會計佣，計番8月、9月底條數，生意額同以前差唔多，所以都唔怕被人炒。
May：完全唔怕！講真，吵來吵去嘅都係啲金舖、藥房、奢侈品牌、化妝舖⋯⋯舊時佢哋專做大陸遊客生意，咁而家無曬遊客自然無生意，就話怕喇。但我返工呢度係賣啲家品嘢，平時客人9成都係屋邨師奶，真係無嘢好怕。就咁睇我返工嗰兩日，哈哈，賣貨賣到無停手啦，生意好過以前。
Ella：坦白講，都有少少擔心，始終我返開啲特賣場part-time，例如Sogo周年慶、千色店展銷攤位等。呢排靜咗好多，返工機會明顯減少。以前暑假係旺季，大把工爭人，而家相反，我哋part-time嗰group變成人人鬥快爭工。
▪ 2019年前線sales人工升得1%？四大範疇零售額跌、租金續升 牽制售貨員薪金
▪ 中五畢業生做緊咩？7大行業不計學歷，更重實戰經驗及人際關係
編：店舖的位置因素有何分別，人流有明顯減少嗎？
Carmen：我哋間舖喺商場，當然唔係大商場，而係二三線舊街坊場。無遇過突然成個場大封鎖，照常開放，但人流的確係比以前少，始終有好多人都會去參加公眾活動，少咗人行街好合理，就算唔係去參加，都怕出街被波及啦！但係，人流和生意未必百分百掛鈎，我哋生意無大跌都無大升，正正常常，平平穩穩。
May：我地舖頭喺街，條街驟眼睇落去係少咗人嘅，但絕對唔係水盡鵝飛，係星期六日夜晚少啲人！平日人流同以往一樣，日頭有時仲會比以前多咗人，可能啲砂煲罌罉消耗得快，要買番。
Ella：係，少咗好多好多！以前暑假，我基本上做唔停手，好多人買嘢。就算唔係暑假，今年上半年嘅星期六日，無論係喺邊個場都好旺，人頭湧湧，大家排曬隊買野。但呢幾個月我幾乎無見到過呢個畫面，唉！之但係，上星期（9月底）喺元朗千色店返工，竟然出奇地多人，可能因為7日激減折扣，終於見番久違嘅排隊買單人龍。
編：你覺得客人的消費意欲有沒有因為時局環境而降低呢？
Carmen：應該點都有影響，唔好講啲客，就咁講我自己，日日睇新聞都心酸，邊有心情去吃喝玩樂買嘢啊！間中問過啲買嘢嘅客，佢哋答覆好正。好多人都講而家唔會再淘寶，咁又要換季，加上橫掂都要出街去遊行，不如順便喺舖買件啱心水，當放鬆吓。消費意欲低咗，但相對地又多番啲客，互相抵消。
May：哈！哈！低咩？我哋又唔係賣啲貴價嘢，生活用品，環境好又要用，時局差都要用，一件嘢都係幾十蚊，香港人點會諗呢啲細錢？近幾個月，公司入咗好多日本製、台灣製家品，價錢貴過平時嗰啲，但買嘅人勁多。以一個日本擺碗膠架為例，兩星期就無曬現貨，好多人訂貨；或者係台灣樹脂可重用掛勾，賣緊$50一個，貴過3M，都好多人買，一個月無晒貨。有麝自然香，消費意欲可以引出嚟。
Ella：擺明啦，低超級多！無人想買嘢，大家都怕經濟轉差，情願留多幾個錢傍身。舊時啲客買嘢超手鬆，睇啱就買，唔會猶豫太耐，而家唔係喇。
▪ 售前工程師 要識sell又要識IT 年薪高達百二萬 唔使考牌但入行超難
總結：
雖說內地遊客減少，零售行業普遍唱淡，但對她們三位目前的影響不算巨大。Ella坦言只是沒有往日那種「揀工開」的隨心所欲，其實還是「有工開」啦！甚至乎May對將來還有種無法言語的樂觀，她相信：有危才有機，脫離單一消費族群，才可以百花齊放。
此文章由原作者及jobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及jobsDB保留採取法律行動的權利。
Increase your chances of getting hired. Create a jobsDB profile
Increase your chances of getting hired. Update your jobsDB profile
