疫情漸退, 金融界招聘市場回暖未?

FacebookWhatsAppTelegramEmailCopy Link

 

香港各行各業喺2020 年上半年或多或少都受到肺炎疫情衝擊。相比起飲食、娛樂、航空、旅遊等行業,銀行及金融行業所受嘅損傷可以話係比較輕微。

2020年薪酬調查報告互動網站等緊你click入嚟﹗即check自己份工嘅人工中位數﹗

無他,「限聚令」約束市民嘅日常活動,但係金融市場照常運作,股票及商品繼續有交投(雖然原油期貨價格跌到負數絕對唔正常,甚至令人大開眼界) 。喺「有生意就有營運」嘅原則之下,如常開市最低限度確保後勤員工,例如交收、風險管理及合規等部門需要繼續存在。

反之,由於各國政府封關,跨境人口流動受到嚴謹限制,銷售人員想要往來中港拜訪客戶固之然困難,北京市對於防疫高度戒備,亦間接令本身長駐北京嘅中資中高層動彈不得。唔係怕出唔到城,而係怕入唔返去。

對於中資機構嚟講,老闆遙距控制公司運作,雖然有各式各樣嘅通訊或視像會議軟件,但係真人唔喺辦公室,就始終係隔重山。同樣地,無法親身面見客戶,對於業務發展亦造成一定障礙。

▪ 金融界MT、GT需要甚麼本領?面試耗時數月 七月打後才申請有另類優勢

▪ 金融界貼地術語—埋數時講瓜水、Good水,其實有咩意思?

銷售不濟,連帶受害嘅仲有營銷 (Marketing) 。喺疫情之下,好多原本計劃好嘅推廣活動都被迫押後,或者改用電子方式進行推廣。

最簡單易明嘅例子,莫過於虛擬銀行(Virtual Banks) ,除咗有一間公司搶先喺2019 年尾出閘開業,其他七間獲發牌嘅機構全部都只聞樓梯響,頂多透過網站收集有興趣優先使用服務嘅潛在客戶個人資料,但實際上並未開張。喺未有生意、未有收入之前,當然就唔敢大張旗鼓燒錢賣廣告啦。

另一個深受打擊嘅範疇,係證券經紀行。執筆之時,已經有超過20 間券商停止營業,數字比起2019 年同期多出一倍。喺市場風高浪急之下,缺乏資本或實力嘅老細「落雨收遮」亦都不足為奇,但係旗下員工因而失業或者至少有一段時間冇糧出,亦係屬無妄之災。

可想而之,金融行業喺2020 年上半年,雖然整體情況冇其他行業咁慘淡,但係亦冇可能大展拳腳,無論前中後,招聘活動通常只限於填補離職員工遺下嘅空缺。冇人起身,就冇Replacement roles 出現,而市道不景下人人自危,能夠保住飯碗已屬萬幸,所以除非情況特殊,否則願意喺呢個時勢離座嘅打工仔肯定唔多。

▪ 世界級打工仔 —金融界Expat人工高過「本地薑」?印度專才成新勢力

不過,長路有盡時,隨住每日確診嘅個案數字跌到接近零,大家似乎都望到隧道嘅盡頭。

事實上,喺五月初政府宣布絕大部份公務員恢復正常上班安排之後,普遍私營機構都有跟隨(原本冇work from home 安排嘅公司就更加不在話下) ,不同崗位嘅員工都返到辦公室,意味住公司運作陸續回復到疫情爆發之前。

其中,掌管公司招聘命脈嘅人力資源部門,即係HR ,喺「齊腳」之後亦開始同管理層商討,係咪可以重啟招聘程序?呢一點,從獵頭公司嘅活動就可以睇到。

喺二、三月期間,headhunter 嘅來電固然少之又少,即使有稀客來電,亦只限於結網捕魚,即係了解定求職市場大概有啲咩candidate ,為日後同僱主介紹嘅工作做好準備。

但係最近情況開始有啲唔同。畢竟大家都希望把握今年剩餘嘅時間,追返頭幾個月錯失嘅時間,商業活動需要極速重回正軌,先前積壓落嘅「購買力」(無論係企業嘅推廣乃至招聘人手) 都會獲得釋放。可以預期,未來幾個月嘅求職市場將會相當之活躍。當「音樂椅」遊戲再度開始,有人開咗個頭,喺連鎖效應之下,自然可以帶動更多招聘。

想知道喺金融行業入面,邊一個範疇會最多空缺,邊類型僱主會最審慎?密切留意下一篇分析。

撰文:職場心經

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

熱門文章
普遍人都會認為政府工是鐵飯碗,穩穩陣陣,工作又安穩。在云云眾多的政府工中,有些是較少人聽過,而要求學歷亦不高(且待遇不差),以下可能是筍工中的筍工。 1. 揀信組助理 所屬部門:郵政局 人工:時薪港幣$72 要求: 完成中三學業,或具同等學...

十大熱門搜尋

Scroll to Top